Túrkııa Qyrǵyzstannan oppozıtsıoner Gúlen uıymdarymen yntymaqtastyqty doǵarýdy talap etýde
BІShKEK. QazAqparat - Búgin qyrǵyz basylymy Túrkııa syrtqy ister mınıstri Mevlıýt Chavýshoǵlynyń Qyrǵyzstan bıligin oppozıtsııalyq qaıratker Fethýllah Gúlenniń jaqtastaryna qarsy shara qoldanýǵa shaqyrǵan úndeýin jarııalady. Alanıadaǵy demokratııany qoldaý aktsııasynda da túrik ishki saıası mekemesiniń basshysy da osyndaı úndeýmen shyqqan.
M.Chavýshoǵlynyń sózderine súıensek, ol Qyrǵyzstan syrtqy ister mınıstri Erlan Abyldaevqa habarlasyp, Túrik bıliginiń oıynsha, áskerı tóńkeris jasaýǵa áreket etken Fethýllah Gúlenniń jaqtastaryna qarsy shara qoldanýdy ótingen. Túrik mınıstri álemniń birneshe eliniń bıligi Túrkııany qoldaǵanyn málimdegen. Onyń aıtýynsha, bul memleketter óz aýmaǵyndaǵy Gúlenge qandaı da bir qatysy bar uıymdardy jabady. Somalıdegi Gúlen jaqtaýshylary elden ketý úshin bir apta ýaqyt suraǵan, Soltústik Kıprde bul uıymdar terrorıstik bolyp sanalady.
«Ázerbaıjan men basqa da elderde osyndaı sharalar jasalýda. Men Qyrǵyzstannyń syrtqy ister mınıstrine habarlasyp, olardyń pikiri ózgermese, bizdiń qarym-qatynasymyzdyń ózgeretinin aıttym. Kezinde biz Gúlen uıymdaryna kómek bergenbiz. Olar bilim berý, mektep týraly aıtqanymen, josparlary múldem bólek bolyp shyqty. Biz óz baýyrlarymyzdan qoldaý kútemiz. Osyndaı qıyn-qystaý kúnderi baýyrmaldyǵymzdy tanytaıyq», - dedi M.Chavýshoǵly.
M.Chavýshoǵly myrza «qarym-qatynastyń ózgerýi» týraly ashyp eshteńe aıtqan joq. Alaıda, «Sebat» qamqorlyǵy aıasynda jumys isteıtin Gúlenniń Qyrǵyzstandaǵy bilim berý mekemelerin jabý týraly aıtylýy múmkin. Budan buryn Túrkııa prezıdenti R.T.Erdoǵan oppozıtsııalyq ıslam ýaǵyzshysy F.Gúlenniń qatysy bar barlyq mekemeni jabý týraly jarlyqqa qol qoıǵan edi. Oǵan sáıkes, myńǵa jýyq jeke mektep, 1200 qor men qaýymdastyq, 35 medıtsınalyq mekeme, 19 odaq pen 15 ýnıversıtet óz jumysyn toqtatty.
Resmı derekterge sáıkes, Qyrǵyzstan aýmaǵynda F.Gúlenge qatysy bar 9 bastaýysh mektep, 16 lıtseı, 2 halyqaralyq mektep jáne halyqaralyq ýnıversıtet resmı túrde jumys isteıdi.
Ázirge Qyrǵyzstan SІM túrkııalyq taraptyń málimdemesi týraly eshqandaı túsinikteme bergen joq.
