Túrkııa koronavırýsqa qatysty shekteýlerdi kúsheıtýi múmkin

NUR-SULTAN. QazAqparat - Shilde aıynyń basynda COVID-19 aýrýshańdyq kórsetkishteriniń ósýine baılanysty birqatar elderdiń bıligi koronavırýstyq shekteýlerdi qaıta engizýde, dep habarlaıdy QazAqparat.

COVID-19 taralýyna jol bermeý jónindegi vekdomstvoaralyq komıssııanyń málimetinshe, Katarda 7 shildeden bastap jergilikti turǵyndar men týrıster jabyq oryndarda, kólikte betperde kııýge mindetti. El turǵyndary bir aıdaı ýaqytqa ǵana shekteýsiz ómir súrdi. Úkimet jabyq qoǵamdyq oryndarda maskalardy mindetti túrde kııýdi 21 mamyrda ǵana toqtatqan bolatyn.

Osyndaı talaptar 8 shildeden bastap Kıprde de qoldanyla bastady.

«Maskalardy 12 jastan asqan barlyq azamattar kııýi kerek», - dedi eldiń Densaýlyq saqtaý mınıstri Mıhalıs Hadzıpandelas.

Ol jańa erejelerdi engizý sebebin sońǵy kúnderdegi barlyq epıdemıologııalyq kórsetkishter men koronavırýspen aýyratyn naýqastardy aýrýhanaǵa jatqyzý sanynyń artýymen túsindirdi.

Túrkııada medıtsınalyq qaýymdastyq (TTB) Úkimetke mindetti túrde maska taǵýdy qaıta engizýge shaqyrdy.

«COVID-19 ınfektsııasyna shaldyǵý derekteri ósýde. Vaktsınatsııany balalardan bastaý kerek, barlyǵyna jabyq oryndarda betperde taǵýdy mindetteý kerek, testter sanyn kóbeıtý qajet, olardyń nátıjeleri týraly kúndelikti málimettermen bólisý kerek», — dep atap ótti medıtsınalyq qoǵamdastyq ókilderi.