Túrkııa qorǵanys salasyn damytýǵa basymdyq berip otyr
ASTANA. KAZINFORM — Túrkııa qarý-jaraq pen áskerı tehnıka satyp alýǵa bólinetin qarjyny arttyryp, otandyq qorǵanys ónerkásibin damytýǵa basymdyq berip otyr, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń vıtse-prezıdenti Djevdet Iylmaz 2027 jylǵy memlekettik bıýdjet jobasynda qarý-jaraq, oq-dári jáne áskerı tehnıka satyp alýǵa jumsalatyn qarjy kólemi edáýir kóbeıetinin aıtty.
Onyń sózinshe, 2027 jyly qarý-jaraq, oq-dári, qarý júıeleri men ózge de qorǵanys jabdyqtaryn satyp alýǵa bólinetin qarjy 229 paıyz artady. Qorǵanys salasyna 2,206 trln túrik lırasy (shamamen 44,5 mlrd dollar), al ishki qaýipsizdikke 25,2 mlrd dollar bólý josparlanǵan. Aıta keteıik, 229 paıyzdyq ósim jalpy qorǵanys bıýdjetine emes, qarý-jaraq pen áskerı tehnıka satyp alýǵa arnalǵan qarajatqa qatysty.
Vıtse-prezıdenttiń málimdeýinshe, sońǵy 25 jylda Túrkııa qorǵanys ónerkásibiniń sheteldik jetkizýshilerge táýeldiligin aıtarlyqtaı azaıtqan. Onyń aıtýynsha, halyqaralyq ahýaldyń qubylýy otandyq qarý-jaraq óndirisin damytýdyń mańyzyn arttyryp otyr.
Túrkııa prezıdenti Rejep Taııp Erdoǵannyń aıtýynsha, 2025 jyly el 180 el men aımaqqa 10 mlrd dollardan astam somaǵa qorǵanys jáne aeroǵarysh ónimderin eksporttaǵan. Ystanbulda ótken «Túrkııanyń ınnovatsııalar aptalyǵy — 2026» is-sharasynda ol ǵylymı zertteýlerdi, tehnologııalyq startaptardy jáne qosylǵan quny joǵary ónim óndirisin damytý mańyzdy ekenin atap ótti.
Túrkııa 2030 jylǵa deıin jalpy quny 100 mlrd dollarǵa baǵalanatyn 100 myń tehnologııalyq startap qurýdy josparlap otyr. Bul baǵyttaǵy negizgi jobalardyń biri — Ystanbuldaǵy Atatúrik áýejaıynyń termınaldary negizinde «Terminal Istanbul» atty iri tehnologııalar jáne kásipkerlik ortalyǵyn ashý.
Bıýdjet jobasynda qorǵanys pen tehnologııalyq damýdan bólek, ınvestıtsııalarǵa 57,5 mlrd dollar, bilim berý salasyna 75,6 mlrd dollar, sondaı-aq jer silkinisiniń zardaptaryn joıý men tabıǵı apattarǵa tózimdilikti arttyrýǵa 17,5 mlrd dollar bólý kózdelgen. Qujat parlamenttiń qaraýyna jiberilip, onyń negizgi kórsetkishteri bıýdjet jáne josparlaý komıtetinde qosymsha talqylanady.
Buǵan deıin Túrkııa qorǵanys kórmesinen túsken tabysty dron ortalyqtaryn damytýǵa jumsaıtynyn habarlaǵan bolatynbyz.
