Túrkııa qonaqúılerdiń jappaı jabylýy týraly qaýesetti joqqa shyǵardy

ASTANA. KAZINFORM – Sońǵy kúnderi túrik jáne halyqaralyq BAQ-ta Túrkııa aýmaǵyndaǵy 4 myńnan astam qonaqúıdiń jappaı jabylǵany týraly alańdatarlyq habarlar tarady, dep jazady Kazinform agenttiginiń menshikti tilshisi.

Alaıda bul týrıster arasynda alańdaýshylyq týdyrǵan jańalyqty eldiń týrızm salasynyń ókilderi tez arada joqqa shyǵardy.

Іri týrıstik holdıngterdiń biriniń basshysy Orhan Sandjardyń aıtýynsha, munda kenetten bolǵan jabylýlar emes, keıbir qonaqúılerdiń jumysyndaǵy tehnıkalyq jáne ákimshilik kemshilikterdi joıýǵa arnalǵan standartty protsedýra týraly sóz bolyp otyr. Ol Túrkııa Týrızm mınıstrligi zań talaptaryna saı kelý úshin nysandarǵa ýaqyt berip otyrǵanyn atap ótti.

Bul qaýesetterge sebep bolǵan — advokat Abıde Saralý aıtqan málimdeme. Ol 4 myń qonaqúıdiń týrıstik nysan sertıfıkaty bolmaǵany úshin mórlengenin aıtqan. Onyń sózinshe, 2021 jyldan bastap qonaqúıler jergilikti bıliktiń ruqsatymen ýaqytsha jumys isteı alatyn bolǵan, biraq jarty jyldyń ishinde resmı sertıfıkat alýǵa mindetti edi. Kóptegen qonaqúıler bul talapty ýaqytynda oryndamaǵan.

Alaıda Orhan Sandjar bul tek ýaqytsha sharalar ekenin, otelderde anyqtalǵan kemshilikter joıylyp jatqanyn jáne týrıstik agenttikterge aldyn ala brondardyń joıylýy týraly eskertý beriletinin atap ótti. Onyń aıtýynsha, 4 myń degen san — qazir zań talaptaryna sáıkestendirý jumystary júrip jatqan nysandardyń jalpy sany.

Sonymen qatar, ol týrısterge jolǵa shyǵar aldynda óz oteliniń statýsyn tekserip, brondy rastaýǵa keńes berdi.

— Salanyń jaǵdaıynda eshqandaı daǵdarys joq, qonaqtar turatyn orynsyz qalmaıdy. Biraq tynyshtyq úshin aldyn ala brondy rastaǵan durys, — dedi Sandjar.

Túrik bıligi men qonaqjaılylyq ındýstrııasynyń ókilderi týrısterdi dúrlikpeýge, tek resmı aqparat kózderine súıenýge shaqyrady.

Buǵan deıin Túrkııada «Sultan Súleımen» 1 jyl 10 aıǵa shartty túrde sottalǵanyn jazdyq.

Túrkııada 24 mln adam baspana jaldap turýǵa májbúr.