Túrkııa kompanııasy Qazaqstanda altyn ken oryndaryn izdeýmen aınalysady

ASTANA. QazAqparat - Qazaqstan men Túrkııanyń taý-ken kompanııalary geologııalyq barlaý baǵytynda birlesken jobany qolǵa aldy. Bul týraly QazAqparat QR Indýstrııa jáne ınfraqurylymdyq damý mınıstrligine silteme jasap habarlaıdy.

Joba maqsaty – paıdaly qazbalardyń perspektıvaly oryndaryn anyqtaý.

QR Indýstrııa jáne ınfraqurylymdyq damý mınıstrliginiń qoldaýymen «Taý-Ken Samuryq» ulttyq taý-ken kompanııasy» AQ basqarma tóraǵasy Baqyt Shirshikbaev pen D Mineral dırektorlar keńesi tóraǵasynyń orynbasary Ilhan Poıraz birlesken qujatqa qol qoıdy.

Geologııalyq barlaý jumystary sátti júzege asyrylǵannan keıin múddeli taraptar birlesken kásiporyn qurýdy josparlap otyr.

«Negizgi kelisimge qol qoıylǵannan keıin eki jaq geologııalyq barlaýǵa lıtsenzııa alyp, birlesken kásiporyndy qurý jónindegi jospardy júzege asyrýǵa kirispek. Osy rette birlesip qolǵa alynǵan joba altyn ken oryndaryn izdestirýge baǵyttalatynyn aıta keteıik. Geologııalyq barlaý jumystaryna qarajat bólýdi túrkııalyq tarap óz jaýapkershiligine alǵany belgili boldy», - delingen IIDM baspasóz qyzmetiniń málimetinde.

Aıta keteıik, D Mineral kompanııasy Dimin Group (Túrkııa) holdınginiń quramyna kiredi. Negizgi qyzmet baǵyty – temir keni men mys óndirý.