Túrkııa qolma-qol aqshasyz tólem júıesine kóshti

ASTANA. KAZINFORM – Ótken jyldyń qorytyndysy boıynsha Túrkııada qolma-qol aqshany paıdalaný aıtarlyqtaı qysqardy, dep habarlaıdy Kazinform.

Túrkııada 2024 jyly debettik jáne nesıelik kartalardy paıdalaný 86 paıyzǵa artyp, 14,87 trıllıon túrik lırasyna (shamamen 420 mıllıard dollar) jetti.

Belgili bolǵandaı, tólemderdiń negizgi ósimi sýpermarketterdegi, saýda ortalyqtary men ınternet-dúkenderdegi satyp alýlardan túsken.

Barlyq tólemniń 29 paıyzyn onlaın tranzaktsııalar quraǵan, bul eldegi elektrondy kommertsııanyń qarqyndy damyǵanyn kórsetedi. Buǵan 2020 jyly COVID-19 pandemııasy áser etti, ol qolma-qol aqshasyz tólemderge kóshýdi jyldamdatty.

Eldegi belsendi tólem kartalarynyń sany ótken jyldyń sońynda rekordtyq deńgeıge jetken. 2024 jyldyń qarasha aıyndaǵy jaǵdaı boıynsha aınalysta 128,93 mıllıon nesıe kartasy jáne 193,45 mıllıon debettik karta boldy.

Túrik tutynýshylary yńǵaılylyq, qaýipsizdik jáne bankter usynatyn kóptegen bonýstyń arqasynda kóbirek elektrondy tólem ádisterin tańdaǵan.

Qolma-qol aqshany paıdalanýdy azaıtýǵa baǵyttalǵan bul úrdis túrik qoǵamynyń jahandyq qarjylyq ózgeristerge beıimdelýge jáne tsıfrlyq ekonomıkany qurýǵa degen umtylysyn kórsetedi.

Buǵan deıin Túrkııanyń ortalyq banki uzaq ýaqyttan beri alǵash ret paıyzdyq mólsherlemelerdi tómendetkenin jazǵan bolatynbyz.

Sonymen qatar, Túrkııanyń Ortalyq banki jalǵan shetel valıýtasy aınalymyna jol bermeý úshin jańa tehnıkalyq sharalar engizip, quqyq qorǵaý organdarymen yntymaqtastyqty nyǵaıtyp jatyr.