Túrkııa klımat jónindegi alǵashqy zańdy qabyldady

ASTANA. KAZINFORM — Túrkııada klımattyń ózgerýine qatysty alǵashqy zań qabyldandy, dep habarlaıdy Kazinform agenttiginiń menshikti tilshisi. 

Túrkııa jahandyq jylynýǵa qarsy kúreste kezekti mańyzdy qadam jasady. Jańa qabyldanǵan zań 2053 jylǵa qaraı kómirtek beıtaraptyǵyna qol jetkizýdi kózdeıdi jáne ulttyq ári óńirlik deńgeıde parnıktik gazdar shyǵaryndylaryn retteıtin mindetti tetikterdi engizedi.

Zańǵa sáıkes, eldiń árbir provıntsııasynda klımat máseleleri jónindegi úılestirý keńesi qurylýy tıis. Bul keńester jalpyulttyq klımat saıasaty aıasynda óńirlik strategııalardy ázirlep, júzege asyratyn bolady. Osylaısha, parnıktik gazdar shyǵaryndylaryn azaıtýǵa baǵyttalǵan keshendi jáne ortalyqtandyrylmaǵan tásil qamtamasyz etiledi.

Zańda ónerkásip sektory erekshe nazarda. El ekonomıkasynyń negizgi salalary úshin shyǵaryndylardy azaıtý jóninde naqty maqsattar men oryndaý merzimderi kórsetilgen mindetti josparlar daıyndalady. Qoıylǵan talaptardy oryndamaǵan kásiporyndarǵa qarjylyq jáne ákimshilik jazalar qarastyrylǵan.

Sondaı-aq zań aıasynda shyǵaryndylardy baqylaý jáne esep berý júıelerin damytý, «jasyl» tehnologııalarǵa ınvestıtsııa tartý jáne turaqty energetıkaǵa kóshý kózdelgen.

Sarapshylar bul zańdy Túrkııanyń klımat saıasaty salasyndaǵy mańyzdy belesi dep baǵalap otyr, ásirese eldiń Parıj kelisimi aıasyndaǵy halyqaralyq mindettemelerin eskersek. Jańa quqyqtyq tetik ishki ekologııalyq tártipti kúsheıtip qana qoımaı, halyqaralyq «jasyl» qarjylandyrý kózderine jol ashýy tıis.

Buǵan deıin Túrkııa 2054 jylǵa qaraı nóldik kómirtek shyǵaryndylaryna negizdelgen ekonomıka qurýdy maqsat etkenin habarlaǵan bolatyn. Osy baǵytta el kórshi memlekettermen energetıkalyq yntymaqtastyqty nyǵaıtýdy kózdep otyr.

Aıta ketelik Túrkııanyń Cheshme kýrortynda orman órti tutanǵany týraly jazǵan edik.