Túrkııa qytaılyq Temu saýda platformasyna aıyppul saldy — sheteldegi qazaq baspasózi

Ózbekstan SІM basshysy Qazaqstannyń jańa elshisin qabyldady — ÓzA

Qazaqstannyń Ózbekstandaǵy jańadan taǵaıyndalǵan Tótenshe jáne Ókiletti Elshisi Eraly Toǵjanov Tashkentte Ózbekstan Respýblıkasynyń Syrtqy ister mınıstri Bahtıer Saıdovqa senim gramotalarynyń kóshirmelerin tapsyrdy. Kezdesý barysynda taraptar eki el arasyndaǵy strategııalyq seriktestik, saýda-ekonomıkalyq yntymaqtastyq, ónerkásiptik kooperatsııa, óńiraralyq baılanystar jáne kólik-logıstıka salasyndaǵy birlesken jobalardy talqylady. Bul týraly osy aptada «ÓzA» aqparat agenttigi habarlady. 

Eske salsaq, Qazaqstan Prezıdentiniń Jarlyǵymen Eraly Toǵjanov Qazaqstannyń Ózbekstandaǵy Tótenshe jáne Ókiletti Elshisi bolyp taǵaıyndaldy. Ol bul qyzmette 2022 jyldan beri elshilikti basqarǵan Beıbit Atamqulovtyń ornyna keldi.

Sondaı-aq osy aptada «ÓzA»-da «Qazaqstannyń Ózbekstandaǵy elshisi dıplomatııalyq mıssııasyn aıaqtady» degen taqyryptaǵy aqparat jarııalandy. 

Habarlamada aıtylýynsha, Ózbekstan Respýblıkasynyń Syrtqy ister mınıstri Bahtıer Saıdov Qazaqstannyń Ózbekstandaǵy Tótenshe jáne Ókiletti Elshisi Beıbit Atamqulovty dıplomatııalyq mıssııasynyń aıaqtalýyna baılanysty qabyldady. Kezdesý barysynda mınıstr elshiniń eki el arasyndaǵy dostyq, tatý kórshilik jáne odaqtastyq qatynastardy nyǵaıtýǵa qosqan úlesin joǵary baǵalap, onyń qyzmeti kezeńinde 2022 jylǵy 22 jeltoqsanda Ózbekstan men Qazaqstan arasynda Odaqtastyq qatynastar týraly shartqa qol qoıylǵanyn atap ótti.

Ózbekstan tarapy Beıbit Atamqulovqa atqarǵan qyzmeti úshin alǵys bildirip, onyń eńbegi Ózbekstan Respýblıkasynyń Prezıdenti Shavkat Mırzıeev tarapynan joǵary baǵalanyp, ol «Dostyq» ordenimen marapattaldy.

Ystyqkólge halyqaralyq ekologııalyq mártebe berilýi múmkin — Eurasia Today

Ystyqkól «Blue Flag» halyqaralyq ekologııalyq sertıfıkatyn ıelengen Ortalyq Azııadaǵy alǵashqy kól atanýy múmkin. Qyrǵyzstan Túrkııanyń qoldaýymen atalǵan baǵdarlamany engizýge daıyndalyp jatyr, dep jazady Eurasia Today aqparat agenttigi. 

Joba aıasynda Qyrǵyzstan jaǵalaý aýmaqtaryn basqarý, sý sapasyn baqylaý, qaldyqtardy basqarý jáne turaqty týrızm baǵytynda Túrkııanyń, sonyń ishinde Antalııa tájirıbesin zerdeleýde. Maýsym aıynda qyrǵyz delegatsııasy «Blue Flag» sertıfıkatyna ıe bolǵan Antalııa jaǵajaılaryna baryp, halyqaralyq talaptardy oryndaý tájirıbesimen tanysty.

TÜRÇEV ókilderiniń málimetinshe, tabıǵı sulýlyǵy men týrıstik áleýeti joǵary Ystyqkól bul sertıfıkatqa úmitker nysandardyń biri. Baǵdarlama tek sý tazalyǵyn ǵana emes, ekologııalyq menedjment, qaýipsizdik, qoljetimdilik, qaldyqtardy tıimdi basqarý jáne ekologııalyq aǵartý talaptarynyń oryndalýyn da qarastyrady.

Qorǵas porty arqyly ımport-eksport júk kólemi tarıhı rekordqa jetti — Halyq gazeti

Qytaıdyń Shyńjań óńirindegi Qorǵas portynda 2026 jyldyń birinshi jartysynda ımporttyq jáne eksporttyq júk kólemi 22,954 mıllıon tonnaǵa jetip, ótken jyldyń sáıkes kezeńimen salystyrǵanda 3,1 paıyzǵa ósti. Qorǵas kedeniniń málimetinshe, bul port tarıhyndaǵy eń joǵary kórsetkish boldy, dep habarlaıdy Qytaıdyń Halyq gazeti basylymy. 

Atalǵan BAQ-tyń dereginshe, taýar qurylymynda ımporttyń negizgi bóligin elektromehanıkalyq ónimder, metall kenderi, aýyl sharýashylyǵy ónimderi men azyq-túlik qurady. Ásirese aýyl sharýashylyǵy ónimderi men azyq-túlik ımportynyń saýda kólemi aıtarlyqtaı artqan.

Al eksport negizinen jańa energetıkalyq kólikter, joǵary tehnologııalyq ónimder, toqyma buıymdary jáne kıim-keshek esebinen qamtamasyz etildi. Sarapshylar muny óńirdegi syrtqy saýda belsendiliginiń artyp, Qorǵas portynyń halyqaralyq júk tasymalyndaǵy róliniń kúsheıýimen baılanystyrady.

Sonymen qatar osy aptada Halyq gazeti basylymynda «Jemeneı beketi arqyly ımport-eksport júk tasymaly 24,7%-ǵa ósti» degen aqparat jaryq kórdi.

Qytaılyq BAQ-tyń málimetinshe, Shyńjańdaǵy Jemeneı beketi Qazaqstannyń Maıqapshaǵaı keden beketine qarama-qarsy ornalasqan. Atalǵan keden beketi — Qazaqstan, Qytaı, Reseı jáne Mońǵolııa memleketteriniń tórt jaqty shekara aımaǵynda. Jemeneı kedeniniń derekteri boıynsha, 2026 jyldyń birinshi jartysynda beket arqyly ımport-eksport júk tasymalynyń jıyntyq kólemi 91 myń tonnany qurap, ótken jyldyń sáıkes kezeńimen salystyrǵanda 24,7%-ǵa ósti.

Onyń ishinde ımporttyq júk tasymalynyń kólemi 38 myń tonna bolyp, ótken jyldyń sáıkes kezeńimen salystyrǵanda 507,3%-ǵa kúrt ósti.

Beket kedendik rásimdeý tıimdiligin arttyrýǵa basa nazar aýdaryp otyr. Aýyl sharýashylyǵynyń jańa ónimderine arnalǵan «jasyl dáliz» ashylyp, táýlik boıy aldyn ala tapsyrys boıynsha tekserý júrgizý engizilip, kedendik rásimdeý ýaqyty aıtarlyqtaı qysqartyldy.

— Qazirgi ýaqytta Ortalyq Azııa naryǵynda Qytaıdyń jeńil mashına jasaý buıymdary men aýyl sharýashylyǵynyń ózindik erekshe ónimderine suranys joǵary, bekettegi syrtqy saýda kásiporyndarynyń bıznes kólemi úzdiksiz ulǵaıyp keledi, - dep jazady qytaılyq BAQ.

Qytaıdaǵy qazaq malshylary Aqbulaq jaılaýynda kókpar jarysyn uıymdastyrdy — Altaı aqparaty

Qytaıdyń Shyńjań óńirindegi Altaı qalasyna qarasty Qyzyltas qalashyǵynyń Aqbulaq jaılaýynda jergilikti qazaq malshylarynyń uıymdastyrýymen dástúrli kókpar jarysy ótti, dep habarlaıdy qytaılyq «Altaı aqparaty» basylymy.

Atalǵan BAQ-tyń málimetinshe, jarys barysynda shabandozdar tulparlaryn quıyndatyp, serkeni taqymǵa basyp, ulttyq oıynnyń kórkin qyzdyrdy. Tartysty básekeni tamashalaýǵa jınalǵan jurtshylyq shabandozdarǵa qyzý qoldaý kórsetip, keń dala jankúıerlerdiń qoshemetine bólendi.

— Kókpar — qazaq halqynyń ejelden kele jatqan ulttyq at sportynyń biri. Erlik pen eptilikti, qaısarlyq pen sheberlikti ushtastyratyn bul oıyn Qytaıdaǵy qazaq qaýymy arasynda da ulttyq dástúrdi dáriptep, mádenı murany saqtaýdyń mańyzdy quraly retinde keńinen nasıhattalyp keledi, — dep jazady qytaılyq basylym.

Tatarstan BRICS elderimen jáne Iranmen yntymaqtastyqty keńeıtýdi kózdeıdi — ParsToday

Tatarstan BRIKS elderimen, ıslam álemimen, Ońtústik-Shyǵys Azııa jáne Latyn Amerıkasy memleketterimen yntymaqtastyqty damytýdy negizgi baǵyttardyń biri retinde qarastyryp otyr. Bul týraly Tatarstan prezıdenti Rýstam Mınnıhanov TV BRICS arnasyna bergen suhbatynda málimdedi, dep jazdy ParsToday aqparat agenttigi. 

Irandyq BAQ-tyń dereginshe, Mınnıhanov 2024 jyly Qazan qalasynda ótken BRICS sammıti Tatarstannyń halyqaralyq bedelin arttyryp, sheteldik ınvestıtsııalar tartýǵa yqpal etkenin atap ótti. Onyń aıtýynsha, ónerkásiptik, tehnologııalyq, kóliktik jáne aýyl sharýashylyǵy áleýeti joǵary respýblıka BRICS elderimen birlesken jobalardy júzege asyrýǵa daıyn.

Tatarstan prezıdenti halal ındýstrııasy, saýda, ınvestıtsııa, logıstıka, tehnologııa, bilim jáne ǵylym salalaryndaǵy áriptestikti keńeıtýge múddeli ekenin jetkizdi. Ol 2026 jyly Qazan qalasynyń Islam áleminiń mádenı astanasy atanýy Irandy qosa alǵanda, BRICS-tiń jańa múshelerimen ekonomıkalyq jáne mádenı baılanystardy nyǵaıtýǵa jańa múmkindik beretinin aıtty.

Túrik jáne qazaq muǵalimder Astanada bas qosty — TRT

Qazaqstannyń elordasy Astanada uıymdastyrylǵan halyqaralyq bilim berý baǵdarlamasynda qazaq jáne túrik muǵalimder bas qosty, dep habalaıdy Túrkııa Radıo Televızııa portaly.

«TRT»-nyń dereginshe, Astanada Túrik yntymaqtastyq jáne koordınatsııa agenttiginiń (TİKA) qoldaýymen, Túrkııa Respýblıkasy Ulttyq bilim berý mınıstrligi men Astana qalasy ákimdiginiń Bilim basqarmasy birlesip uıymdastyrǵan halyqaralyq bilim berý baǵdarlamasy aıaqtaldy.

Baǵdarlama aıasynda Túrkııadan kelgen 6 maman Qazaqstannyń ár óńirinen jınalǵan 120 muǵalimge zamanaýı oqytý ádisteri boıynsha dáris oqydy. Qatysýshylar teorııalyq bilimderin praktıkalyq tapsyrmalar arqyly jetildirip, «Integratsııalanǵan oqytý jáne úıretý modelderine kirispe» trenınginde óz pánderine arnalǵan oqý stsenarıılerin ázirlep, jobalar kórmesinde tanystyrdy.

Sertıfıkattardy tabystaý rásiminde TİKA-nyń Astanadaǵy baǵdarlama úılestirýshisi Fýat Erdoǵmýsh bilim berý salasyndaǵy yntymaqtastyq Qazaqstan men Túrkııa arasyndaǵy dostyq pen baýyrlastyq baılanystardy odan ári nyǵaıta túsetinin atap ótti.

Sondaı-aq osy aptada «TRT» basylymynda «Túrkııa qytaılyq „Temu“ saýda platformasyna aıyppul saldy» degen taqyryptaǵy aqparat jarııalandy. 

Atalǵan BAQ-tyń deregine súıensek, Túrkııanyń Básekelestikti qorǵaý basqarmasy «Temu» saýda platformasyna josparlanǵan jergilikti tekserýge kedergi keltirgeni úshin 3,696 mln túrik lırasy (shamamen 78 myń AQSh dollary) kóleminde ákimshilik aıyppul saldy. Degenmen kompanııaǵa qatysty resmı básekelestik tergeýin bastamaý týraly sheshim qabyldandy.

Basqarmanyń málimetinshe, aldyn ala tekserý «Temu» platformasynyń úshinshi tarap satýshylarynyń taýar baǵasyna yqpal etip, Túrkııanyń Básekelestik týraly zańynyń talaptaryn buzýy múmkin degen kúdikke baılanysty júrgizilgen. Alaıda ınspektorlar Stambuldaǵy kompanııa keńsesine barǵan kezde ǵımarat jabyq bolyp, tekserý júrgizý múmkin bolmaǵan. Osyǵan baılanysty kompanııa memlekettik baqylaýǵa kedergi keltirdi dep tanyldy.

«Temu» ókilderi baǵa belgileý tájirıbesine qatysty istiń jabylǵanyn jáne aıyppul salynǵanyn rastady. Kompanııa resmı habarlama alǵan kúnnen bastap 60 kún ishinde bul sheshimge Ankaranyń ákimshilik sotynda shaǵymdana alady.

Eske salaıyq, buǵan deıin shetelde qazaq baspasózi tarıhta alǵash ret adam tárizdes robottar tiri janýarǵa ota jasaǵany týraly habar taratqan edi.