Túrkııa kedeni tórt aıda 750 mln dollarlyq kontrabandanyń jolyn kesti
ASTANA. KAZINFORM – Túrkııada keden qyzmeti bıylǵy tórt aıda 750 mln dollarlyq kontrabandanyń jolyn kesti, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń Saýda mınıstrligi keden bólimsheleri zamanaýı tehnologııalar men jetildirilgen taldaý ádisterin qoldana otyryp, kontrabandaǵa qarsy aýqymdy kúresti jalǵastyryp jatqanyn málimdedi.
Vedomstvonyń habarlaýynsha, bıylǵy jyldyń alǵashqy tórt aıynda keden qyzmetkerleri 2 264 operatsııa júrgizip, nátıjesinde quny 750 mln dollardan asatyn kontrabandalyq taýarlar men esirtki zattaryn tárkilegen. Bul kórsetkish ótken jyldyń sáıkes kezeńimen salystyrǵanda 106 paıyzǵa artqan.
Operatsııalar barysynda 9,2 tonna esirtki, 1,5 mln-nan astam mashına bólshekteri, 862 myń elektrotehnıkalyq jáne elektrondyq ónim, sondaı-aq 459 myńnan astam medıtsınalyq buıym tárkilendi.
Mınıstrlik málimetinshe, tek sáýir aıynyń ózinde 572 operatsııa júrgizilip, aldyn alynǵan kontrabanda kólemi shamamen 275 mln dollardy quraǵan. Bul ótken jylǵy kórsetkishten 216 paıyzǵa kóp.
Bir aı ishinde keden qyzmeti 1,9 tonna esirtki, 111 myńnan astam medıtsınalyq taýar, 315 tonna janarmaı, 208 kólik quraly jáne basqa da zańsyz ákelingen zattardy tárkilegen.
Eske sala ketsek, buǵan deıin Túrkııadaǵy esirtkige qarsy operatsııa kezinde júzdegen kúdikti ustalǵanyn jazdyq.
