Túrkııa qazaqtary saıası qýǵyn-súrgin jáne asharshylyq qurbandaryn eske aldy

YSTANBUL. QazAqparat - Keshe Ystanbulda jergilikti qazaq dıasporasynyń ókilderi XX ǵasyrda Qazaqstanda bolǵan saıası qýǵyn-súrgin men asharshylyq qurbandaryn eske aldy. Marqumdardyń rýhtaryna Quran baǵyshtalyp, duǵa oqyldy, dep habarlaıdy QazAqparat.

Ystanbuldaǵy Qoja Ahmet ıAssaýı atyndaǵy ortalyqta ótken jıynǵa Túrkııa qazaqtarynyń aqsaqaldary men beldi ókilderi qatysty.

Jıynda sóz sóılegen Qazaqstannyń Ystanbuldaǵy Bas konsýly Álim Baıel ádilettilik pen adamgershilik úshin jáne ulttyq sanany bekitý maqsatynda qazaq halqynyń basynan ótken zulmattyń tolyqtaı zerdelenip, tıisti saıası jáne quqyqtyq baǵasyn alý qajettigin aıtty.

Zulmat jyldarynda mıllıondaǵan qazaqtyń asharshylyqtan kóz jumǵany, atajurttan syrtqa kóship, saıası repressııaǵa ushyraǵany belgili.

Ulttyń shoqtyǵy bıik kósh bastar azamattarynyń qandyqol júıe tarapynan qyrǵynǵa ushyratylýy – óz aldyna úlken qasiret.

Budan bólek, sol kezeńde qazaq jerine tutas halyqtardyń jer aýdarylǵany belgili.

Zorlyq-zobalańnan esin jııa almaı jatqanyna qaramastan, qazaq halqy sol kezde óz dalasyna aıdalǵan barsha ulystardy baýyryna basty.