Túrkııa Qazaqstannyń Orta dálizdi damytý bastamasyn qoldady
ASTANA. KAZINFORM — Túrkııa Qazaqstan Prezıdenti Qasym-Jomart Toqaevtyń Orta dálizdi TRIPP kólik bastamasymen ıntegratsııalaý jónindegi usynysyna qoldaý bildirdi. Bul týraly Kazinform agenttiginiń Túrkııanyń Ankara qalasyndaǵy menshikti tilshisi habarlaıdy.
Túrkııanyń bıleýshi Ádilet jáne damý partııasy tóraǵasynyń orynbasary, Túrki memleketterimen baılanys basqarmasynyń basshysy Kúrshad Zorlýdyń pikirinshe, Qazaqstannyń bastamasy Azııa men Eýropa arasyndaǵy kólik baılanysyn nyǵaıtýǵa, sonyń nátıjesinde Orta dálizdiń halyqaralyq tranzıttik baǵyt retindegi mańyzyn arttyrýǵa yqpal etýi múmkin.
Eske salaıyq, Ortalyq Azııa memleketteri basshylary men Ázerbaıjannyń segizinshi konsýltatıvtik kezdesýinde Qasym-Jomart Toqaev Orta dálizdi TRIPP kólik bastamasymen yqpaldastyrý máselesin sarapshylar deńgeıinde talqylaýdy usynǵan bolatyn.
— Óńirlik qaqtyǵystar men olardyń saldarynan týyndaǵan ekonomıkalyq jáne energetıkalyq turaqsyzdyq jaǵdaıynda túrki memleketteri arasyndaǵy yntymaqtastyqty nyǵaıtýdyń mańyzy arta túsedi, — dedi Kúrshad Zorlý Túrkııanyń Kojaelı provıntsııasynda ótken Túrki álemi jastarynyń kezdesýinde.
Saıasatkerdiń aıtýynsha, Nahchyvan baǵytyndaǵy kólik ınfraqurylymyn damytý, sonyń ishinde temirjol salý konteınerlik tasymal múmkindikterin keńeıtýge jáne gýmanıtarlyq operatsııalardy júzege asyrýǵa jol ashady.
Buǵan deıin Túrki álemi jastarynyń kezdesýi «Ortaq mura — birtutas júrek» uranymen ótkeni habarlanǵan bolatyn.
Aıta keteıik, Prezıdent Qasym-Jomart Toqaev Ortalyq Azııa jáne Ázerbaıjan memleketteri basshylarynyń VIIІ Konsýltatıvtik kezdesýine qatysty.
Sonymen qatar, Prezıdent Ortalyq Azııa jáne Ázerbaıjan memleketteri basshylarynyń VIIІ Konsýltatıvtik kezdesýinde jasandy ıntellekt salasyndaǵy yntymaqtastyqtyń mańyzyna toqtaldy.
