Túrkııa Qazaqstanǵa 1 mlrd dollar kóleminde ınvestıtsııa quımaq
ANKARA. QazAqparat - Aldaǵy eki jylda Túrkııa Qazaqstanǵa 1 mlrd dollar kóleminde ınvestıtsııa quıýdy josparlap otyr. Qazaqstannyń Túrkııadaǵy Tótenshe jáne Ókiletti Elshisi Abzal Saparbekuly osylaı málim etti, dep habarlaıdy QazAqparat tilshisi.
Túrkııada eki el arasyndaǵy dıplomatııalyq qarym-qatynastardyń 25 jyldyǵy jáne «Rýhanı jańǵyrý» baǵdarlamasy aıasynda ótkizilip jatqan qazaq jýrnalısteriniń baspasóz týry aıasyndaǵy uıymdastyrylǵan kezdesýde Elshi Abzal Saparbekuly eki el arasyndaǵy ekonomıkalyq qatynastarǵa toqtaldy.
«Aldaǵy eki jylda Qazaqstanǵa Túrkııa tarapynan shamamen 1 mlrd AQSh dollarynyń ınvestıtsııasyn jetkizsek degen josparymyz bar. Osy ýaqytqa deıin elimizge 2,1 mlrd dollar tikeleı túrik ınvestıtsııasy barǵan. Aldaǵy kóktemge deıin 300 mln dollar ınvestıtsııa quıylady dep kózdep otyrmyz. Sońǵy bir jyldyń ishinde 80 mln dollardy quraıtyn ınvestıtsııalyq jumystar bastalyp ketti. Bul - bizdiń negizgi baǵytymyzdyń biri. Qazirgi tańda bizdi ár úsh kezdesýimizdiń biri ınvestorlarmen ótedi», - dedi Qazaqstan Elshisi.
Elshi Abzal Saparbekuly Astana 5 jeltoqsan kúni ótetin «Investıtsııalyq forýmǵa» Túrkııadan salmaqty delegatsııa qatysqaly otyrǵanyn sóz etti .
«Investıtsııalyq forýmǵa 200-ge jýyq kompanııa qatysqaly jatyr. Sonyń 50-ge jýyǵy naqty jobalary bar túrik kompanııalary»,- dedi Qazaqstan Elshisi.
Aıta keteıik, Túrkııada uıymdastyrylǵan baspasóz týry eki eldiń dıplomatııalyq qarym-qatynastaryndaǵy jetistikter men aldaǵy josparlardy jáne Túrkııanyń búgingi ahýalymen tanystyrýǵa arnalǵan. Baspasóz týry aıasynda qazaqstandyq jýrnalıster Ankara qalasynda Túrkııa úkimetine qarasty Túrik yntymaqtastyq jáne úılestirý agenttiginiń (TIKA) tóraǵa orynbasary Súreıa Ermeppen, Túrkııa úkimetine qarasty Baspasóz jáne aqparat bas dırektsııasynyń dırektory Mehmet Aqjarmen kezdesedi. Sonymen qatar, qazaqstandyq delegatsııa Túrkııada 2016 jyly 15 shildede bolǵan tóńkeris áreketin kórý maqsatynda Túrkııa Uly Ulttyq májilisine baryp, Túrkııa-Qazaqstan Parlamentteri arasyndaǵy Dostyq tobynyń tóraǵasy depýtat Halıýk Ipekpen kezdespek.
Túrkııadaǵy baspasóz týry aıasynda uıymdastyrylatyn mańyzdy shara 5 jeltoqsan kúni ótkizilmek. Ol kúni Qazaqstan men Túrkııa arasyndaǵy qarym-qatynastyń 25 jyldyǵyna arnalǵan halyqaralyq konferentsııa ótedi. Konferentsııa Túrkııa Úkimetiniń beldi músheleri men eldiń eks-prezıdenti Abdýlla Gúl qatysady dep josparlanyp otyr.
Baspasóz týry aıasynda qazaq jýrnalısteri Túrkııanyń Antalııa qalasyna baryp, Mádenıet jáne týrızm basqarmasynyń dırektory Ibragım Ajarmen kezdesedi. Antalııadaǵy kezdesýden soń, delegatsııa Gazıantep qalasyndaǵy Sırııa bosqyndary ornalasqan Izıp-2 lagerin kóredi.
Túrkııadaǵy qazaq jýrnalısteriniń sapary 10 jeltoqsan kúni Ystanbul qalasynda aıaqtalady.
