Túrkııa Qazaqstanda aýrýhana salyp qana qoımaı, dári de óndiredi
ASTANA. KAZINFORM — Densaýlyq saqtaý mınıstri Aqmaral Álnazarova men Túrkııanyń Densaýlyq saqtaý mınıstri Kemal Memıshoglý Antalıa qalasynda ótken COP31 halyqaralyq konferentsııasynyń sheńberinde 2027–2028 jyldarǵa arnalǵan yntymaqtastyq josparyna qol qoıdy.
Densaýlyq saqtaý mınıstrliginiń baspasóz qyzmeti málim etkendeı, qujat medıtsınalyq ınfraqurylymdy damytý, farmatsevtıkalyq óndiris, densaýlyq saqtaý salasyn tsıfrlandyrý, medıtsınalyq ǵylymdy damytý, kadrlar daıarlaý jáne alǵashqy medıtsınalyq-sanıtarııalyq kómekti jetildirý sııaqty negizgi baǵyttardy qamtıdy.
— Qol qoıylǵan jospardy qol jetkizilgen ýaǵdalastyqtardy iske asyrýdyń naqty tetigi retinde qarastyramyz. Bizdiń mindetimiz — naqty is-sharalardy aıqyndap, jaýapty uıymdardy belgilep, olardyń júıeli túrde oryndalýyn qamtamasyz etý, — dep atap ótti Aqmaral Álnazarova.
Kezdesý barysynda vedomstvo basshysy túrik kompanııalarynyń Qazaqstandaǵy medıtsınalyq ınfraqurylymdy damytýǵa qosyp otyrǵan úlesine toqtaldy. Atap aıtqanda, Rönesans Holding kompanııasy Kókshetaý qalasynda 630 tósektik kópbeıindi aýrýhananyń qurylysyn júrgizip jatyr. Al YDA Group Túrkistan jáne Petropavl qalalaryndaǵy aýrýhanalardyń qurylysyna qatysýda.
Orhun Medical kompanııasymen ıadrolyq medıtsına men dıagnostıkalyq ınfraqurylymdy damytý boıynsha ınvestıtsııalyq kelisim jasaldy. Qazir Mańǵystaý jáne Qyzylorda oblystarynda PET/KT ortalyqtary jumys istep tur.
Abdi İbrahim jáne Nobel İlaç kompanııalarymen dárilik zattar men belsendi farmatsevtıkalyq ıngredıentter óndirisin qurýdy kózdeıtin eki iri ınvestıtsııalyq kelisimge qol qoıyldy.
Budan bólek, eki eldiń retteýshi organdary arasynda farmatsevtıkalyq ınspektsııa, zerthanalyq synaqtar jáne farmakologııalyq qadaǵalaý baǵyttaryndaǵy yntymaqtastyqty keńeıtý josparlanyp otyr.
Qazaqstan tarapy Túrkııanyń aýrýhanalardy tsıfrlyq basqarý tájirıbesin, onyń ishinde e-Nabız platformasyn engizýge, klınıkalyq jáne ákimshilik protsesterdi avtomattandyrýǵa, resýrstar men patsıentter aǵynyn basqarýǵa qyzyǵýshylyq tanytty.
Kadrlardyń biliktiligin arttyrý baǵytynda taraptar birlesken ǵylymı zertteýler júrgizý, taǵylymdamalar uıymdastyrý, klınıkalyq tájirıbe almasý jáne Túrkııanyń Densaýlyq saqtaý ınstıtýttarymen (TÜSEB) yntymaqtastyq ornatý máselelerin qarastyrdy. Sondaı-aq medıtsınalyq kadrlardy akkredıtteý men sertıfıkattaý boıynsha túrik tájirıbesin zerdeleý kózdelgen.
Kezdesý barysynda Qazaqstanda jetekshi túrik mamandarynyń qatysýymen, kardıologııa, neırohırýrgııa, ońaltý jáne shuǵyl medıtsına baǵyttary boıynsha sheberlik saǵattary men patsıentterge konsýltatsııalar uıymdastyratyn «Túrik medıtsınasy kúnderin» ótkizý usynyldy.
Yntymaqtastyqtyń taǵy bir baǵyty — medıtsınalyq-sanıtarııalyq alǵashqy kómekti damytý, aýrýlardyń aldyn alý jáne medıtsınalyq qyzmetterdiń qoljetimdiligin arttyrý boıynsha tájirıbe almasý.
— Qazaqstan medıtsınalyq qyzmetterdiń qoljetimdiligin keńeıtýge, aýrýlardyń aldyn alýǵa jáne densaýlyq saqtaý júıeleriniń turaqtylyǵyn nyǵaıtýǵa baǵyttalǵan alǵashqy medıtsınalyq-sanıtarııalyq kómek jónindegi elderdiń jahandyq koalıtsııasyn ilgeriletý jumystaryn jalǵastyrýda. Osyǵan baılanysty Túrkııa Respýblıkasyn Koalıtsııaǵa qosylý múmkindigin qarastyrýǵa taǵy da shaqyramyn, — dedi Qazaqstannyń Densaýlyq saqtaý mınıstri.
Kezdesý qorytyndysy boıynsha taraptar jaýapty uıymdardy aıqyndap, 2027–2028 jyldarǵa arnalǵan yntymaqtastyq josparynyń is-sharalaryn jaqyn arada praktıkalyq iske asyrýǵa kirisýge ýaǵdalasty.
Osydan buryn Túrkııa BUU-nyń COP31 klımattyq konferentsııasyn alǵash ret ótkizip otyrǵanyn jazdyq.
