Túrkııa qazaǵy, qoǵam qaıratkeri Dálelhan Janaltaıdyń týǵanyna 100 jyl toldy

ASTANA. QazAqparat - «Otandastar qory» Prezıdent rhıvaimen birlesip «Arhıv jáne qoǵam. Táýelsiz Qazaqstan tulǵalary: Dálelhan Janaltaı» taqyrybynda dóńgelek ústel men tarıhı-qujat kórmesin uıymdastyrdy. Shara Ulttyq akademııalyq kitaphanada ótti, dep habarlaıdy QazAqparat.

Jıyn sheteldegi qazaq dıasporasynyń kórnekti ókili, qoǵamdyq-saıası qaıratker Dálelhan Janaltaıdyń (1922-2012) dúnıege kelgenine 100 jyl tolýyna arnalǵan.

Kórmede usynylǵan arhıv qujattary Prezıdent arhıvindegi D. Janaltaıdyń jeke qorynda saqtaýly.

Dálelhan Janaltaı 1922 jyly 15 maýsymda Altaı aýdany (qazirgi Qytaı Halyq Respýblıkasy, Shyńjan-Uıǵyr avtonomııaly aýdany) Altaı aımaǵyndaǵy Órmegeıti jaılaýynda dúnıege kelgen.

Dinı medreseni bitirip, 1937 jyly ákesimen birge qajylyq paryzyn ótegen.

1940 jyldan bastap qoǵamdyq qyzmetke kirisken. 60-jyldary Túrkııaǵa qonys aýdarǵan.

Dálelhan Janaltaı «Qıly zaman, qıyn kúnder» romanynyń avtory.

Ol oqý-aǵartý jumystarymen qatar, qazaqtardyń, qyrǵyzdar men uıǵyrlardyń quqyǵyn qorǵaýmen aınalysqan.

Dálelhan Janaltaı kóp til meńgergen, ana tili qazaqshamen qatar arab, qytaı, orys, aǵylshyn, ýrdý jáne túrki tilderin erkin bilgen.

Dóńgelek ústelge sheteldegi qazaq dıasporasynyń kórnekti qaıratkerleri, Qazaqstanǵa oralǵan qandastar, memlekettik jáne qoǵam qaıratkerleri, joǵary oqý oryndarynyń professorlyq-oqytýshy quramy men stýdentteri, buqaralyq aqparat quraldarynyń ókilderi, Dálelhan Janymhanuly Janaltaıdyń týystary qatysty.