Túrkııa, Qatar, Pákistan men Indonezııa áskerı óndiristi damytýǵa kelisti

Túrkııa, Qatar, Pákistan jáne Indonezııa 21 qazanda Dohada qarý-jaraqty birlesip óndirýdi, áskerı tehnologııalar almasýdy jáne tórt eldiń qorǵanys áleýetin arttyrýdy kózdeıtin «Badr» memorandýmyna qol qoıdy. Bul týraly Túrkııanyń Ulttyq qorǵanys mınıstrligi málimdedi.

Memorandýmǵa Túrkııa men Pákistannyń qorǵanys mınıstrleri, Qatar premer-mınıstriniń orynbasary ári qorǵanys isteri jónindegi memlekettik mınıstri, Indonezııa qorǵanys mınıstriniń orynbasary jáne Túrkııanyń Qorǵanys ónerkásibi basqarmasynyń basshysy qol qoıdy.

Arab tilinen aýdarǵanda «tolǵan aı» degen maǵynany bildiretin «Badr» memorandýmy tórt eldiń áskerı óndiris salasyndaǵy yntymaqtastyǵyn keńeıtýdi kózdeıdi. Qujat aıasynda ǵylymı zertteýler júrgizý, jańa qorǵanys tehnologııalaryn ázirleý, mamandar daıarlaý jáne zamanaýı qarý-jaraq júıelerin birlesip jasaý baǵyttary qamtylǵan.

Túrkııanyń Qorǵanys mınıstrligi kelisimniń ekonomıkalyq mańyzyna da toqtalyp, onyń tórt memlekettiń óndiristik áleýeti men tehnologııalyq múmkindikterin biriktirýge jol ashatynyn atap ótti.

— Tehnologııalar almasý, birlesken ázirlemeler jáne ulttyq óndiristik múmkindikterdi nyǵaıtý — qorǵanys ónerkásibiniń turaqty damýynyń negizi. Biz daıyn ónimdi satyp alýmen shektelmeı, elderdiń óz kadrlyq áleýeti men ónerkásiptik ınfraqurylymyn damytýǵa múmkindik beretin áriptestikke erekshe mán beremiz, — dedi Túrkııanyń Qorǵanys ónerkásibi basqarmasynyń basshysy Halýk Gergıýn.

Onyń aıtýynsha, memorandým Túrkııa, Qatar, Pákistan jáne Indonezııanyń qorǵanys ónerkásibindegi múmkindikterin ózara ushtastyryp, naqty birlesken jobalardy júzege asyrýǵa jol ashady. 

Anadolu agenttiginiń málimetinshe, kelisim qol qoıylǵan kúnnen bastap kúshine enip, birlesken jobalardy basqarýdyń eki deńgeıli júıesin qalyptastyrýdy qarastyrady.

Atqarýshy keńes yntymaqtastyqtyń basym baǵyttaryn aıqyndap, birlesken jobalardy irikteýmen aınalysady. Al Strategııalyq keńes bastamalardy maquldap, olardy júzege asyrý merzimderin bekitedi.

Mundaı basqarý júıesi tórt memlekettiń ózara ýaǵdalastyqtan naqty iske kóshýine, qarý-jaraq óndirisi, avıatsııa-ǵarysh tehnologııalary jáne áskerı mamandar daıarlaý salalaryndaǵy yntymaqtastyqty damytýǵa múmkindik beredi.

Birlesken jumystyń alǵashqy nátıjeleri taıaý ýaqytta jarııalanady.

Kelisim aıasyndaǵy jobalardy júzege asyrýda qorǵanys ónerkásibi jaqsy damyǵan Túrkııa jetekshi ról atqarady dep josparlanyp otyr. 

NATO quramyndaǵy áskeri sany jaǵynan ekinshi orynda turǵan Túrkııa sońǵy jyldary Parsy shyǵanaǵy elderimen áskerı-tehnıkalyq yntymaqtastyǵyn keńeıtti. Atap aıtqanda, Qatar aýmaǵynda túrik áskerı bazasy ornalasqan. Ankara Dohanyń qorǵanys qabiletin nyǵaıtýǵa da qoldaý kórsetip keledi.

Buǵan qosa, tamyz aıynda Túrkııa, Pákistan jáne Saýd Arabııasy Mekkede úshjaqty ózara qorǵanys týraly kelisimge qol qoıdy. Qujatqa sáıkes, qatysýshy elderdiń birine jasalǵan shabýyl úsheýine de jasalǵan shabýyl retinde qarastyrylady.

«Badr» atty jańa tórtjaqty memorandýmnyń sıpaty ózgeshe. Ol negizinen áskerı-ónerkásiptik yntymaqtastyqty damytýǵa baǵyttalǵan.

Qujatqa Taıaý Shyǵysta AQSh pen Izraıldiń Iranǵa qarsy soǵysyna baılanysty qaqtyǵys jalǵasyp, Parsy shyǵanaǵy elderiniń qaýipsizdigine tóngen qater kúsheıgen tusta qol qoıyldy.

Eske sala keteıik, Saýd Arabııasy, Pákistan jáne Túrkııa áskerı yntymaqtastyqty nyǵaıtýǵa keliskeni habarlanǵan bolatyn.

Buǵan deıin Saýd Arabııasy, Túrkııa jáne Pákistannyń qorǵanys kelisimine birneshe el qosylýǵa nıetti ekenin jazǵan edik.