Túrkııa qarasorany ónerkásiptik jáne medıtsınalyq maqsatta ósirýge ruqsat berdi

ASTANA. KAZINFORM — Túrkııada ónerkásiptik, medıtsınalyq jáne tutynýshylyq maqsatta qarasora ósirý tártibin qaıta aıqyndaıtyn jańa reglament kúshine endi, dep habarlaıdy Kazinform agenttiginiń menshikti tilshisi.

Túrkııanyń Aýyl sharýashylyǵy jáne orman mınıstrligi qarasorany ósirý men baqylaýǵa qatysty jańartylǵan reglamentti bekitti. Qujat «Resmı habarshyda» jarııalanyp, zańdy kúshine endi. Ol egis júrgizýden bastap ónim jınaýǵa deıingi búkil óndiristik tsıkldi qamtyp, ósimdiktiń maqsatsyz paıdalanylýyn boldyrmaýǵa baǵyttalǵan qosymsha sharalardy engizedi.

Reglamentke sáıkes, talshyq, tuqym jáne sabaǵyn alý úshin qarasora ósirýge eldiń 21 provıntsııasynda, sonyń ishinde Samsýn, Kastamoný, Izmır, Konıa, Rıze jáne Zongýldak óńirlerinde ruqsat berildi. Óndiris belgilengen talaptardy saqtaı otyryp, atalǵan provıntsııalardyń ózinde de, olardyń aýdandarynda da júzege asyrylýy múmkin.

Qujatta qarasorany medıtsınalyq jáne farmatsevtıkalyq maqsatta ósirý sharttary da jeke kórsetilgen. Mundaı óndiris tek Memlekettik astyq basqarmasyna (TMO) qarasty mamandandyrylǵan zaýyt aýmaǵynda, sondaı-aq Densaýlyq saqtaý mınıstrliginiń ruqsaty bar uıymdastyrylǵan agrarlyq aımaqtarda nemese qaýipsizdigi joǵary nysandarda ǵana júzege asyrylady. Bul — jabyq, kúzetiletin ári klımattyq baqylaýy bar úı-jaılar.

Kosmetıkalyq jáne qosymsha ónimder jasaýǵa arnalǵan qarasorany ónerkásiptik jáne medıtsınalyq maqsatta ósirýge ruqsat berilgen óńirlerde, ashyq alqapta da, jylyjaıda da ósirýge bolady.

Jańa erejeler baqylanatyn agrarlyq óndiristi damytýǵa, qarasoranyń ónerkásiptik jáne medıtsınalyq qoldanylý aıasyn keńeıtýge, sonymen qatar bul saladaǵy memlekettik qadaǵalaýdy kúsheıtýge baǵyttalǵan.

Buǵan deıin Túrkııada medıtsınalyq kannabısti paıdalanýǵa resmı túrde ruqsat berilgeni habarlanǵan edi.