Túrkııa Qara teńizden taǵy bir iri gaz ken ornyn tapty
«Bizdiń «Fatıh» burǵylaý kemesi «Sakarıa» ýchaskesiniń Amasra-1 uńǵymasynda kólemi 135 mıllıard tekshe metrdi quraıtyn tabıǵı gaz jańa ken ornyn anyqtady», - dedi Túrkııa eliniń prezıdenti Rejep Taıyp Erdoǵan.
Memleket basshysy Túrkııanyń Qara teńizde anyqtaǵan tabıǵı gaz qorynyń jalpy kólemi osymen 540 mıllıard tekshe metrge jetkenin atap ótti.
Ol Amasra-1 uńǵymasy aýdanyndaǵy burǵylaý jumystary jalǵasyp otyrǵanyn jáne el bıligi bul aımaqtan «jańa jaqsy jańalyqtardy» kútip otyrǵanyn málimdedi.
Prezıdent Erdoǵan sondaı-aq tabıǵı gazdy teńizden qurlyqqa úsh kezeńmen jetkizý josparlanyp otyrǵanyn atap ótti.
Onyń aıtýynsha, birinshi kezeńde tabıǵı gazdy teńiz túbinen óndirý júıeleri ornatylady, al ekinshi kezeńde tabıǵı gazdy qurlyqta óńdep, ony paıdalanýǵa daıyndaıtyn qurylǵyny iske qosý josparlanǵan.
«Úshinshi kezeń – bul teńizdegi júıe men qurlyqtaǵy nysan arasyndaǵy baılanysty qamtamasyz etetin qubyr jelisi», - dep baıandady Túrkııa prezıdenti.