Túrkııa Qara teńizdegi gaz ken oryndaryn ıgerý úshin 10 mlrd dollar bóledi

ANKARA. QazAqparat - Túrkııa bıligi Qara teńizdegi gaz ken oryndaryn ıgerý úshin 10 mıllıard AQSh dollary kóleminde ınvestıtsııa bólýge nıetti, dep habarlaıdy QazAqparat menshikti tilshisi Anadolu agenttigine silteme jasap.

Zongýldak provıntsııasyndaǵy tabıǵı gaz óndirisi jáne «Sakarıa» gaz ken orny resýrstyq sektordy qoldaýǵa arnalǵan memlekettik jobaǵa engizildi. Osy sheshimge sáıkes, 2021 jyldyń 1 qańtarynan bastalǵan ınvestıtsııalyq qoldaý taǵy 11 jylǵa sozylady. Al bul salaǵa salynǵan qarjy resýrstary salyq pen kedendik jeńildikterdiń barlyq túrlerin alady. Bul ınvestıtsııalyq baǵdarlamanyń nátıjesinde túrik energetıkasy jylyna shamamen 14 mıllıard tekshe metr tabıǵı gaz óndire alady, bul óz kezeginde el azamattary úshin 1000-nan astam jumys ornyn ashady dep boljanyp otyr.

Eske salaıyq, buǵan deıin Túrkııa prezıdenti Rejep Taıyp Erdoǵan Qara teńizde tabıǵı gazdyń úlken qory tabylǵanyn málimdegen bolatyn, al bılik 2023 jylǵa qaraı ony ishki naryqqa jetkize bastaıdy dep kútýde.

Bul rette Túrkııa basshysy «Sakarıa» kenishindegi Dýnaı-1 ýchaskesindegi barlanǵan gaz qorynyń kólemi shamamen 405 mıllıard tekshe metrdi quraıtynyn málimdedi.