Túrkııa Izraılmen barlyq saýda-sattyqty toqtatty

ASTANA. KAZINFORM – Sáýir aıynda Túrkııanyń Saýda mınıstrligi Gaza sektorynda atysty toqtatýdy jáne aımaqqa gýmanıtarlyq kómektiń kedergisiz aǵynyn qamtamasyz etýdi talap etip, Izraılge 54 sanattaǵy taýar eksportyna shekteý qoıdy, dep habarlaıdy DW aqparat agenttigi. 

Túrkııa Izraıl armııasynyń Gaza sektoryndaǵy áskerı operatsııasyna baılanysty Izraılden taýar ımporttaý jáne eksporttaýdy tolyǵymen toqtatty. Bul týraly 2 mamyr, beısenbi kúni esimderi atalmaǵan eki túrik sheneýnigine silteme jasaǵan Bloomberg agenttigi habarlady. Izraıl Syrtqy ister mınıstri Israel Kats Ankaramen saýda-sattyqty toqtatý týraly aqparatty rastady. 

Kats X áleýmettik jelisinde Túrkııanyń bul sheshimi – túrik halqy men bıznes ókilderiniń múddelerin elemeý, halyqaralyq saýda kelisimderin elemeý dep jazdy. Onyń aıtýynsha, Izraıl Túrkııamen saýda-sattyqqa dereý balama jasap, jańa jetkizýshiler taýyp, jergilikti óndiristi ulǵaıtýǵa kirispek. 

Buǵan deıin Túrkııanyń Saýda mınıstrligi Gaza sektorynda atysty toqtatqanǵa deıin jáne aımaqqa gýmanıtarlyq kómektiń jetkilikti kólemin kedergisiz jetkizýdi qamtamasyz etpeıinshe, Izraılge eksportty shekteıtinin málimdegen. Shekteý 9 sáýirde kúshine enip, taýarlardyń 54 sanatyna qatysty boldy, sonyń ishinde bolat, kerosın, tyńaıtqyshtar, qurylys jabdyqtary jáne kólikter bar.

Túrkııa statıstıka ınstıtýtynyń málimetinshe, Túrkııa men Izraıl arasyndaǵy taýar aınalymy 2023 jyly 6,8 mlrd dollardy qurady. Onyń 76 paıyzy túrik eksportyna tıesili.