Túrkııa ınvestorlary Almatyda farmatsevtıkalyq zaýyt salýǵa qarjy bóledi
QR Densaýlyq saqtaý mınıstri Ajar Ǵınııat Qazaqstan Prezıdenti Qasym-Jomart Toqaevtyń Túrkııa Respýblıkasyna memlekettik sapary aıasynda Nobel Ilac farmatsevtıkalyq kompanııasynyń basshysy Hasan Ýlýsamen birlesken jobalar boıynsha kezdesý ótkizdi.
«Densaýlyq saqtaý salasyndaǵy ekijaqty yntymaqtastyqty odan ári jandandyrý, sondaı-aq seriktestik qarym-qatynastarymyzdyń tabysty kórsetkishi, ol búgingi kúni Almaty qalasynda ekinshi farmatsevtıkalyq zaýyt salý jónindegi yntymaqtastyq týraly kelisimge qol qoıý bolyp tabylady», - dedi A.Ǵınııat kezdesýde.
Mınıstr bıyl farmatsevtıkalyq ónim shyǵarý boıynsha «Nobel AFF» AQ birlesken qazaqstandyq zaýytynyń qurylǵanyna týra 20 jyl tolatynyn eske saldy.
Nobel Ilac kompanııasy qoldanystaǵy óndiristi jańǵyrtýǵa jáne keńeıtýge, sondaı-aq Almaty qalasynda ekinshi farmatsevtıkalyq zaýyt salýǵa qosymsha 55 mln dollar ınvestıtsııalaýdy josparlap otyr.
Qazirgi ýaqytta jobalaý-smetalyq qujattar jáne tehnıkalyq-ekonomıkalyq negizdeme ázirlenip jatyr. Olardy 2022 jylǵy birinshi jartyjyldyqtyń sońyna deıin aıaqtaý jáne 2025 jylǵy jeltoqsanda tolyq aıaqtaı otyryp, jobany kezeń-kezeńimen iske asyrýǵa kirisý josparlanýda.
Sapar barysynda Densaýlyq saqtaý mınıstri Ajar Ǵınııat Almaty qalasynda farmatsevtıkalyq preparattardy óndirý boıynsha osy attas kompanııanyń basshysy Zeınep Atabaımen ekijaqty kelisimge qol qoıdy.
Mınıstrdiń aıtýynsha, atalǵan kásiporyn biregeı dárilik zattar men medıtsınalyq buıymdardyń otandyq óndirisin damytýǵa, otandyq farmatsevtıkalyq ónimniń eksporttyq áleýetin arttyrýǵa, sondaı-aq ǵylymı jáne kadrlyq áleýetti nyǵaıtýǵa múmkindik beredi.
Qol qoıylǵan Kelisim aıasynda ATABAY KIMYA SANAYI TICARET kompanııasy zaýyt qurylysyna 10 mln AQSh dollar ınvestıtsııalaýdy josparlap otyr. Jobany iske asyrý merzimi 2023 jyldyń sońyna deıin, jańa jumys oryndarynyń sany 200-ge jetedi.