Túrkııa ınvestorlar men eksporttaýshylarǵa salyq jeńildikterin jarııalady
ASTANA.KAZINFORM - Túrkııa eksporttaýshylarǵa salyq jeńildikterin jáne qarjy sektoryndaǵy kompanııalarǵa uzaq merzimdi salyq jeńildikterin qamtıtyn reforma paketin daıyndap jatyr, dep habarlaıdy Kazinform agenttiginiń Ankaradaǵy tilshisi.
Túrkııa prezıdenti Rejep Taıyp Erdoǵan «Ǵasyr Túrkııasy – Myqty ınvestıtsııalyq ortalyq» baǵdarlamasy aıasynda ınvestıtsııalyq ahýaldy jaqsartý boıynsha jańa sharalar paketin jarııalady. Reformanyń negizgi elementi – uzaq merzimdi salyq jeńildikterin qosa alǵanda, kólemdi salyq jeńildikteri. Reformalardyń maqsaty – sheteldik kapıtal aǵynyn arttyrý, eksport áleýetin keńeıtý jáne Túrkııanyń jahandyq básekege qabilettiligin nyǵaıtý.
Jarııalanǵan sharalarǵa sáıkes, Ystanbul qarjy ortalyǵynda jumys isteıtin kompanııalar belgili bir sharttar oryndalǵan jaǵdaıda 20 jylǵa deıin korporatıvtik salyq jeńildigin ala alady. Tranzıttik saýdamen aınalysatyn sýbektiler úshin salyq mólsherlemesi nólge deıin tómendetilýi múmkin.
Eksporttaýshylarǵa arnalǵan korporatıvtik salyq mólsherlemeleri de qaıta qaraldy: eksporttaýshy óndirýshiler úshin ol 9%-ǵa deıin, al tek eksportqa baǵyttalǵan kompanııalar úshin 14%-ǵa deıin tómendetildi.
Óziniń aımaqtyq ortalyqtaryn Túrkııaǵa kóshiretin halyqaralyq kompanııalar úshin arnaıy salyq jeńildikteri qarastyrylǵan. Mundaı uıymdardyń sheteldik operatsııalarynan túsetin tabysy 20 jyl boıy salyqtan ishinara nemese tolyq bosatylady.
Reforma aıasynda sáýlet, ınjenerııa, baǵdarlamalyq jasaqtama jáne dızaın sııaqty qyzmetter eksportyn yntalandyrý sharalary da keńeıtiledi. Shetelde kórsetiletin osyndaı qyzmetterden túsetin tabysty salyqtan tolyq bosatý josparlanǵan.
Sonymen qatar, elge qaıtarylǵan qarajatqa jeńildikpen salyq salý jáne deklaratsııa talaptary oryndalǵan jaǵdaıda salyq tekserýlerinen bosatýdy kózdeıtin jańa kapıtaldy repatrıatsııalaý baǵdarlamasy ázirlendi.
Biz buǵan deıin Túrkııa qorǵanys kórmesinen túsken tabysty dron ortalyqtaryn damytýǵa jumsaıtynyn habarlaǵan edik.
