Túrkııa ınflıatsııanyń baıaýlaýyna baılanysty negizgi mólsherlemeni 43%-ǵa deıin tómendetti
ASTANA. KAZINFORM – Túrkııanyń Ortalyq banki beısenbi kúni negizgi paıyzdyq mólsherlemeni 300 bazıstik tarmaqqa tómendetip, 43%-ǵa deıin túsirdi. Bul sheshim eldegi ınflıatsııanyń baıaýlaýyna baılanysty aqsha-nesıe saıasatyn jumsartýdyń qaıta bastalǵanyn bildiredi. Bul týraly Kazinform agenttiginiń Túrkııadaǵy menshikti tilshisi.
Aqsha-nesıe saıasaty jónindegi komıtet otyrysynan keıin Ortalyq bank retteýshisi bir kúndik qaryz alý men berý mólsherlemeleriniń de sáıkesinshe 49%-dan 46%-ǵa jáne 44,5%-dan 41,5%-ǵa deıin tómendetilgenin málimdedi.
Resmı statıstıkaǵa sáıkes, maýsym aıyndaǵy jyldyq ınflıatsııa 35,05% boldy. Salystyrmaly túrde, ótken jyldyń mamyr aıynda bul kórsetkish 75%-ǵa jetken edi.
Ortalyq bank maýsym aıynda ınflıatsııalyq qysym turaqty bolǵanyn atap ótti, alaıda shilde aıynda maýsymdyq faktorlarǵa baılanysty ýaqytsha ósim bolýy múmkin ekenin eskertti. Soǵan qaramastan, ekonomıkalyq suranystyń báseńdeýi deflıatsııalyq áserin saqtap otyr.
Bul sheshim naryqtaǵy kútýlerden asyp tústi. Sarapshylar negizinen mólsherleme 250 bazıstik tarmaqqa deıin tómendeıdi dep boljaǵan bolatyn, alaıda boljamdar aýqymy 250-den 350 bazıstik tarmaqqa deıin ózgerip turdy.
Sheshim jarııalanǵannan keıin túrik lırasy turaqty kúıinde qaldy — AQSh dollaryna shaqqandaǵy baǵamy shamamen 40,48 deńgeıinde saqtaldy.
Ortalyq bank aldaǵy sheshimderge «saqtyqpen qaraıtynyn» jáne «ár otyrysta jeke sheshim qabyldanatynyn» atap ótti.
Sondaı-aq, bank ınflıatsııa boıynsha orta merzimdi maqsatty baǵdardy — 5% deńgeıinde saqtap otyrǵanyn rastady. Mamyr aıynda jarııalanǵan boljamǵa sáıkes, 2025 jyldyń sońyna deıin ınflıatsııa 24%-ǵa deıin tómendeýi tıis.
Analıtıkterdiń baǵalaýynsha, paıyzdyq mólsherlemelerdi tómendetý jalǵasýy múmkin. 2025 jyldyń sońyna qaraı mólsherleme 36% deńgeıine deıin túsýi yqtımal, al jumsartý tsıkli keminde 2026 jyldyń úshinshi toqsanyna deıin jalǵasady dep boljanyp otyr.
Buǵan deıin Túrkııadaǵy AES qurylysshylary jalaqynyń tólenbeýine baılanysty ereýilge shyqqany týraly jazǵan edik.