Túrkııa halqy jetim qalǵan balalardy asyrap alýǵa nıet bildirdi - Ýfýk Ekıdjı

ASTANA. QazAqparat – Túrkııa halqy jetim qalǵan balalardy asyrap alýǵa nıet bildirdi. Muny Túrkııa Respýblıkasynyń Qazaqstandaǵy Tótenshe jáne ókiletti elshisi Ýfýk Ekıdjı málim etti, dep habarlaıdy QazAqparat tilshisi.

«Túrkııadaǵy otbasylar jer silkinisi kezinde ata-anasynan aırylǵan balalarǵa patronat otbasy bolýdy surady. Keshe jarııalanǵan resmı málimetke sáıkes, tirkelgen 1 858 balanyń 1 645-iniń kýálikteri anyqtaldy. Olardyń 1 314-i anyqtalyp, ózderiniń otbasylaryna tabystaldy. 213 bala boıynsha kýálikterin anyqtaý jumystary jalǵasyp jatyr. Jer silkinisi kezinde jetim qalǵan balalar Túrkııanyń Otbasy isteri jáne áleýmettik qyzmet kórsetý mınıstrliginiń qamqorlyǵynda. Olardyń jeke basy týraly málimetter anyqtalyp, otbasylary tabylsa, onda balalar óz januıalaryna beriledi. Sonymen qatar, olar únemi osy mınıstrliktiń baqylaýynda bolady. Kóp búldirshin jaraqat alyp, kúızeliske ushyrady. Olarǵa psıhologııalyq kómek kerek», - dedi Ýfýk Ekıdjı.

Ýfýk Ekıdjı qazirgi tańda zilzaladan zardap shekken 1,6 mln Túrkııa azamatynyń baspana máselesi sheshilgenin málimdedi.

Sonymen qosa, búginge deıin jer silkinisinen qıraǵan jáne qulaý aldynda turǵan 156 myń ǵımarat anyqtalǵan.

Eske salaıyq, 6 aqpanda Kahramanmarashta magnıtýdasy 7 baldan asatyn eki jer silkinisi boldy. Jerasty dúmpýleri eldiń 10 provıntsııasynda, sondaı-aq kórshiles memleketterde, sonyń ishinde Sırııada da sezildi.