Túrkııa halqynyń 30%-dan astamy eski úılerde turady

ASTANA. KAZINFORM —  Túrkııada turǵyn úı jaǵdaıyn jaqsartýdy qajet etetin adamdardyń sany óte kóp. Kóptegen azamat eldegi eski jáne qolaısyz turǵyn úılerde ómir súrip jatyr, dep habarlaıdy Kazinform agenttiginiń menshikti tilshisi. 

Túrkııa statıstıka ınstıtýtynyń (TÜİK) málimetine sáıkes, el halqynyń shamamen 31,3%-y kúrdeli jóndeýdi qajet etetin úılerde turady. Sonymen qatar, turǵyndardyń 30,2%-y jylytý júıesiniń máselelerin bastan ótkerýde, bul kóbinese úılerdegi tıisti jylý oqshaýlaýynyń joqtyǵynan týyndaıdy.

Bul rette Stambýl josparlaý agenttiginiń (İPA) basshysy Býgra Gekche Túrkııa halqynyń 32%-y nashar turǵyn úı jaǵdaıynda ómir súretinin atap ótti.

Onyń aıtýynsha, óz baspanasy joq azamattardan bólek, santehnıkasy eski, tóbesinen sý aǵatyn, qabyrǵalary dymqyl jáne tereze jaqtaýlary shirigen úılerde turýǵa májbúr azamattar sany da aıtarlyqtaı kóp.

Mundaı jaǵdaıda turǵyndar úıdi ózderi jylytýǵa tyrysady, bul órt shyǵý qaýpin arttyrady. Túrkııanyń kóp bóligi seısmıkalyq qaýipti aımaqta ornalasqan, sondyqtan jer silkinisi kezinde mundaı nashar úılerdiń opyrylyp túsý qaýpi joǵary. Eski úılerde turatyn adamdar osyndaı qaýip-qaterge ushyraıdy.

– Túrkııada nashar turǵyn úı jaǵdaıynda ómir súretin halyqtyń úlesi óte joǵary, bul eldi Eýropa elderi arasynda sońǵy orynǵa yǵystyryp otyr, – dep atap ótti Býgra Gekche.

Eýropalyq statıstıka agenttiginiń (Eurostat) málimeti boıynsha, Túrkııadaǵy turǵyn úı qorynyń sapasy Eýropadaǵy eń nashar deńgeıde.

Sonymen qatar, Býgra Gekche memlekettik turǵyn úı baǵdarlamalary – TOKİ jáne Emlak Konut-tyń qazirgi saıasatyn synǵa aldy. Sebebi bul baǵdarlamalar usynatyn baspanalar úshin tólem sharttary Túrkııadaǵy eń tómengi jalaqydan úsh ese joǵary (61 698 túrik lırasy – shamamen 860 000 teńge).

İPA basshysynyń aıtýynsha, bul baǵdarlamalar jaǵdaıy nashar turǵyndardyń máselesin sheshpeıdi, kerisinshe, joǵary tabysy bar satyp alýshylarǵa baǵyttalǵan.

Buǵan deıin biz eldiń iri megapolısterinde halyq sany shamadan tys artyp jatqany, al keıbir aımaqtarda turǵyndar sany múldem az ekeni týraly jazǵan edik.

Sonymen qatar, Túrkııanyń ońtústik-shyǵys provıntsııalarynda eki jyl buryn bolǵan apatty tabıǵı zilzaladan keıin turǵyn úı-kommýnaldyq qoryn qalpyna keltirý jumystary belsendi túrde júrgizilip jatyr.