Túrkııa halqy Respýblıka kúnin atap ótip jatyr

ASTANA.KAZINFORM - 29 qazanda Túrkııa halqy respýblıkanyń 102 jyldyǵyn atap ótedi, bul el tarıhyndaǵy eń mańyzdy oqıǵalardyń biri, bıliktiń halyq qolyna ótýin bildiredi, dep habarlaıdy Kazinform menshikti tilshisi.

Mustafa Kemal Atatúriktiń basshylyǵymen Anadolyny okkýpatsııadan azat etkennen keıin, Túrkııa Uly Ulttyq Májilisi (TUUM/parlament) 1923 jyly 29 qazanda Túrkııa Respýblıkasynyń qurylýyn resmı túrde jarııalady. Sol kúnnen bastap «egemendik halyqqa tıesili» qaǵıdasy úkimettiń negizine aınaldy.

1920 jyldyń 23 sáýirinde parlamenttiń ashylýy eldegi bılik monarhııadan halyq qolyna aýysqan jańa dáýirdiń bastalýyn belgiledi. Táýelsizdik soǵysyndaǵy jeńisten jáne 1923 jyly 24 shildede Lozanna kelisimine qol qoıylǵannan keıin jańa memlekettiń táýelsizdigi halyqaralyq deńgeıde tanyldy.

1923 jyly 13 qazanda Ankara resmı túrde Túrkııanyń astanasy bolyp jarııalandy, al eki aptadan keıin, 29 qazanda parlament jańa basqarý túrin – respýblıkany bekitip, Mustafa Kemal Atatúrikti tuńǵysh prezıdent etip saılady.

Sodan beri Respýblıka kúni (túrikshe: Cumhuriyet Bayramı) ulttyq mereke retinde atalyp ótip keledi. 1924 jyly jańa memlekettiń negizin qalaýdy eske alý úshin jyl saıyn merekelik sharalar ótkizý jáne 101 zeńbirekten salıýt atý týraly sheshim qabyldandy.

Búgin, 102 jyldan keıin Túrkııa bul kúndi bostandyqtyń, táýelsizdiktiń jáne ulttyq birliktiń sımvoly retinde erekshe maqtanyshpen atap ótip jatyr.

Qasym-Jomart Toqaev Rejep Taıyp Erdoǵandy jáne túrik halqyn ulttyq merekesi – Respýblıka kúnimen quttyqtady.