Túrkııa halqy qartaıyp bara jatyr
ASTANA. KAZINFORM – Túrkııanyń keıbir provıntsııalarynda halyqtyń birtindep qartaıýynan ortasha jas 43-ke jetti, dep habarlaıdy Kazinform-nyń menshikti tilshisi.
Túrkııa Statıstıka Instıtýtynyń (TÜİK) málimetinshe, túrik halqynyń ortasha jasy 2024 jyly 34,4 jasqa jetti jáne 2026 jylǵa qaraı 35 jastan asady dep shamalanyp otyr. 2015 jyly bul kórsetkish 31 jyl boldy. Mundaı demografııalyq ózgerister halyqtyń qartaıý protsesiniń jedeldeýin kórsetedi.
Túrkııada egde jastaǵy halyq dep esepteletin 65 jáne odan joǵary jastaǵy adamdardyń sany ótken jyly 9 mln-ǵa jýyqtap, sońǵy bes jylda 20 paıyzdan astam ósti. Eger 2018 jyly egde jastaǵy halyqtyń jalpy halyq sanyna qatynasy 8,8%-dy qurasa, 2024 jyly ol 11%-ǵa deıin ósti. 2024 jyly egde jastaǵy halyqtyń shamamen 45%-y erler jáne 55%-dan astamy áıelder boldy. Demografııalyq boljamǵa sáıkes, egde jastaǵy halyqtyń úlesi 2030 jyly 12,9%, 2040 jyly 16,3%, 2060 jyly 22,6% jáne 2080 jyly – 25,6% bolady.
Sınop, Gıresýn jáne Kastamoný provıntsııalarynda ortasha jas qazirdiń ózinde 43-ke jetti. Qysqa merzimdi perspektıvada eńbekke qabiletti jastaǵy adamdar sanynyń ósýi jalǵasyp jatqanymen, uzaq merzimdi perspektıvada onyń azaıýy kútilip otyr, bul bolashaqta el ekonomıkasyna óz áserin tıgizetini anyq.
Mamandardyń boljamynsha, 2050 jylǵa qaraı Túrkııa halqynyń ortasha jasy 45 jasqa deıin ósýi múmkin. Osyndaı demografııalyq ózgeris týý kórsetkishiniń tómendeýine jáne ómir súrý uzaqtyǵynyń artýyna tikeleı baılanysty.
Buǵan deıin Túrkııada 2025 jyl «Otbasy jyly» dep jarııalanǵanyn jazǵan bolatynbyz. Bul bastama aıasyndaǵy jańalyqtar el jastary men demografııasyn qoldaýǵa baǵyttalǵan.
Egeı teńizinde jer silkinisiniń jıileýi Túrkııa men Grekııaǵa qater tóndiretini týraly jazǵan edik.