Túrkııa halqy 2023 jylǵy 6 aqpandaǵy joıqyn jer silkinisi qurbandaryn eske aldy
ASTANA. KAZINFORM — Túrkııada 2023 jylǵy 6 aqpanda eldiń ońtústik-shyǵysynda bolǵan joıqyn jer silkinisteri saldarynan qaza tapqan azamattardy eske alý is-sharalary ótti, dep habarlaıdy Anadolý agenttigi.
El turǵyndary qasiretti zilzaladan kóz jumǵandardyń rýhyna duǵa baǵyshtady. Eske alý rásimderi Túrkııanyń ártúrli óńirlerinde uıymdastyryldy.
Jer silkinisi qurbandaryn eske alý maqsatynda birqatar túrik provıntsııalarynda «Tynyshtyq sherýi» ótti. Tańǵy 04:17-de 65 sekýndqa sozylǵan únsizdik jarııalandy (bul Kahramanmarash provıntsııasyndaǵy alǵashqy kúshti jer silkinisiniń uzaqtyǵyna sáıkes keledi).
2023 jylǵy 6 aqpan, dúısenbi kúni Túrkııanyń ońtústik-shyǵysynda magnıtýdasy jeti baldan asatyn eki qýatty jer silkinisi tirkeldi: jergilikti ýaqyt boıynsha 04:17-de — 7,7 ball, al 13:24-te — 7,6 ball. Jer silkinisteriniń epıtsentri Kahramanmarash provıntsııasynda ornalasqan.
«Ǵasyr apaty» dep atalǵan bul zilzala 11 provıntsııany qamtydy.
Jerasty dúmpýleri kórshiles elderde de sezildi, onyń ishinde Sırııa, Lıvan, Soltústik Kıpr Túrik Respýblıkasy (SKTR), Grek Kıpri jáne Irak bar.
Aýyr qıraýlar men adam shyǵyndary Kahramanmarashpen qatar Hataı, Osmanıe, Adyıaman, Dııarbakyr, Shanlyýrfa, Gazıantep, Kılıs, Adana, Malatıa jáne Elıazyg provıntsııalarynda tirkeldi.
Osy tabıǵı apat saldarynan 53 537 adam qaza taýyp, taǵy 107 213 adam jaraqat aldy.
Іzdestirý-qutqarý jumystaryna kómektesý úshin Túrkııaǵa álemniń 93 elinen qutqarý brıgadalary keldi.
El boıynsha 7 kúndik ulttyq aza tutý jarııalandy. Jer silkinisinen zardap shekken óńirlerde tótenshe jaǵdaı rejımi engizildi.
Tabıǵı apat saldaryn joıý jumystaryna jalpy sany 650 myń adam jumyldyryldy. Olardyń qatarynda shetelden kelgen 11 488 maman, 35 250 izdestirý-qutqarý qyzmetkeri jáne 142 myńǵa jýyq qaýipsizdik kúshteriniń ókilderi bar.
350 shatyrly qalashyqta 645 myń shatyr tigildi, al 414 konteınerli qalashyqta 215 224 konteıner ornatyldy.
Eske sala keteıik, jýyrda Túrkııadaǵy zilzaladan keıingi qalpyna keltirý jumystary áli jalǵasyp jatqanyn jazdyq.
Al BUU Túrkııadaǵy jer silkinisi shyǵynyn 100 mlrd dollarǵa baǵalady.