Túrkııa geotermaldyq energetıkany belsendi damytyp keledi

ASTANA. KAZINFORM – Túrkııa geotermaldyq elektr stantsııalarynyń ornatylǵan qýaty boıynsha álemdegi úzdik bes eldiń qataryna endi jáne jylý energııasyn tikeleı paıdalaný jaǵynan ekinshi orynǵa shyqty.

Sońǵy jyldary el jańartylatyn energııa kózderi salasynda aıtarlyqtaı ilgeriledi. Geotermaldyq resýrstarǵa basymdyq bergen Túrkııada búginde ondaǵan elektr stantsııasy jumys isteıdi. Olar birneshe óńirdi elektr qýatymen jáne jylýmen qamtamasyz etip otyr. Eń iri jobalardyń qatarynda halyqaralyq qarjy ınstıtýttarynyń, sonyń ishinde Eýropa qaıta qurý jáne damý bankiniń (EQDB) qoldaýymen júzege asqan «Qyzyldere» jáne «Efeler» keshenderi bar.

Geotermaldyq energııa tek elektr óndirýge ǵana emes, sonymen birge eldiń áleýmettik ınfraqurylymyn damytýǵa da úles qosýda. Onyń jylýy 125 myńnan astam úıdi jylytyp, iri jylyjaı sharýashylyqtarynyń úzdiksiz jumysyn qamtamasyz etedi. Munda jyl boıy kókónis pen jemis-jıdek, sonyń ishinde eksportqa arnalǵan qyzanaq ósiriledi.

Mundaı jetistikke memleket tarapynan kórsetilgen qoldaý men salalyq reformalar áser etti. Úkimet geotermaldyq energetıkany damytý týraly arnaıy zań qabyldap, «jasyl tarıfterdi» engizip, ınvestorlarǵa yntalandyrý tetikterin usyndy. Bul baǵyttaǵy jobalardy qarjylandyrýǵa Dúnıejúzilik bank te júzdegen mıllıon dollar bóldi.

Aıta keteıik, buǵan deıin Túrkııada qurǵaqshylyqty baqylaý qyzmeti iske qosylǵany habarlandy.