Túrkııa Gazadaǵy halyqqa 101 myń tonnadan astam gýmanıtarlyq kómek jiberdi

ASTANA. KAZINFORM — Túrkııa Prezıdenti Ákimshiliginiń kommýnıkatsııalar basqarmasy habarlaǵandaı, Túrkııa Gazaǵa shuǵyl gýmanıtarlyq kómek kórsetýdi jalǵastyrýda. Qazirgi ýaqytta aımaqqa 101 271 tonna gýmanıtarlyq júk jetkizilgen, dep habarlaıdy Anadoly. 

Bul týraly basqarmanyń NSosyal áleýmettik jelisindegi jarııalanymynda aıtyldy.

Málimdemede Túrkııa Prezıdenti Rejep Taııp Erdoǵannyń jetekshiligimen Túrkııanyń barlyq halyqaralyq alańdarda Gazanyń daýysyna aınalyp, álemge shuǵyl kómek kórsetýge shaqyryp otyrǵany atap ótildi. Sondaı-aq Túrkııanyń Gazaǵa jedel gýmanıtarlyq kómek jetkizýdi jalǵastyryp jatqanyna nazar aýdaryldy.

Túrkııa kóp jyldan beri blokadadaǵy Gazanyń beıbit turǵyndaryna kómek jiberip keledi jáne 2023 jyldyń 7 qazanynan beri Izraıl shabýyldaryna ushyrap, ashtyq pen aýyr jaǵdaıǵa tap bolǵan jazyqsyz turǵyndardy qoldaý úshin bar kúshin salyp otyr.

Túrkııanyń Syrtqy ister mınıstrligi, Іshki ister mınıstrligi, Densaýlyq saqtaý mınıstrligi, Tótenshe jaǵdaılar basqarmasy (AFAD), Túrik Qyzyl Jarty aıy jáne azamattyq qoǵam uıymdary Izraıldiń Gazadaǵy shabýyldary týdyrǵan gýmanıtarlyq daǵdarystyń alǵashqy kúninen bastap kómek sharalaryn qolǵa aldy.

Resmı málimetke sáıkes, 2023 jyldyń qazan aıynan beri Túrkııa Gazaǵa 101 271 tonna gýmanıtarlyq kómek jetkizdi.

Jetkizilgen kómektiń negizgi bóligi:

16 keme jáne 14 ushaq arqyly jetkizilgen;

281 238 gıgıenalyq jıyntyq,

550 tonna sanıtarlyq zattar,

1451 generator,

júk tıegish, 3 jyljymaly ashana,

351 ýaqytsha turǵyn konteıner,

25 180 shatyr,

113 608 kórpe,

19 798 uıyqtaıtyn qap,

151 455 turmystyq zattar,

25 729 tonna azyq-túlik,

65 273 tonna un,

3 171 tonna aýyz sý,

469 486 kıim-keshek,

1083 oıynshyq jınaǵy.

Medıtsınalyq kómek:

Ankara 8 dala gospıtalin qurdy,

53 jedel járdem kóligin jiberdi,

247,5 tonna medıtsınalyq qural-jabdyq jetkizdi,

Gazadan Túrkııaǵa 430 naýqas pen 450 erip júrgen adamdy 9 ushaqpen ákeldi.

Sonymen qatar, Túrkııa Túrik Qyzyl Jarty aıy jáne Tótenshe jaǵdaılar agenttigi (AFAD) arqyly Gazaǵa 7,5 mln dollar kóleminde qarjylaı kómek kórsetti.

Aıta ketelik Gaza sektoryna bes elden gýmanıtarlyq kómek jetkizilgen edi.