Túrkııa Gazadaǵy atysty toqtatý rejıminiń monıtorıngisine qatysady
ASTANA. KAZINFORM — Túrkııa Gaza sektorynda Izraıl men HAMAS arasynda qol jetkizilgen atysty toqtatý kelisiminiń oryndalýyn qadaǵalaıtyn jumys tobynyń quramyna qosylýǵa nıetti, dep habarlaıdy Anadoly aqparat agenttigi.
Bul týraly Túrkııa prezıdenti Rejep Taııp Erdoǵan málimdedi.
Túrkııa basshysy Gazaǵa gýmanıtarlyq kómekti jedel jetkizý, tutqyndar almasý jáne Izraıldiń Palestına eksklavyna jasaǵan shabýyldaryn dereý toqtatýdy qamtamasyz etýdiń erekshe mańyzdylyǵyn atap ótti.
Túrkııa prezıdenti Ankara halyqaralyq qaýymdastyqtyń Gaza sektoryn qalpyna keltirýdegi kúsh-jigerin belsendi túrde qoldaıtynyna sendirdi.
Saıasatker Túrkııanyń Gazadaǵy atysty toqtatý kelisiminiń múltiksiz oryndalýyn jiti qadaǵalaıtynyn basa aıtty.
— Túrkııa Gazadaǵy genotsıdti tez arada toqtatýǵa jáne aımaqta beıbitshilik ornatýǵa umtylady. Álemde Gaza halqynan artyq beıbitshilik, qaýipsizdik jáne turaqtylyqqa eshkim laıyq emes, — dedi ol.
Eske sala ketsek, 10 qazanǵa qaraǵan túni Izraıl HAMAS qozǵalysymen Gaza sektoryndaǵy kelisimniń birinshi kezeńin ratıfıkatsııalady.
Buǵan deıin Túrkııa prezıdenti qol jetkizilgen kelisimge qanaǵattanǵanyn bildirip, Tramp jáne Qatar men Mysyr deldaldaryna alǵys aıtty.