Túrkııa ǵalymdary Arktıkadaǵy altynshy ekspedıtsııasyn bastady
ASTANA. KAZINFORM — Túrkııa Prezıdenti ákimshiliginiń qoldaýymen, Ónerkásip jáne tehnologııa mınıstrliginiń úılestirýimen jáne TÜBİTAK Polıarlyq zertteýler ınstıtýtynyń (KARE) jetekshiligimen 6-ulttyq Arktıkalyq ǵylymı ekspedıtsııa (TASE-VI) bastaldy. Bul týraly Anadoly agenttigi jazdy.
Ekspedıtsııa quramynda 12 túrik ǵalymy, Argentına, Bolgarııa jáne Ýrýgvaıdan kelgen 3 sheteldik zertteýshi, sondaı-aq klımattyń ózgerýi boıynsha ǵylymı jobalar baıqaýynda jeńimpaz atanǵan 3 mektep oqýshysy bar.
Ǵylymı top Ystanbuldan Norvegııanyń Oslo qalasyna jetip, odan ári Tromseden arnaıy zertteý kemesimen Arktıkaǵa attandy. Ekspedıtsııa barysynda keme soltústik endiktiń 82-gradýsyna deıin jetedi dep josparlanyp otyr.
Shamamen 25 kúnge sozylatyn ekspedıtsııa aıasynda 12 ǵylymı joba júzege asyrylady. Zertteýler okeanografııa, bıologııa, hımııa, atmosferalyq ǵylymdar, meteorologııa, geodezııa jáne spýtnıktik júıeler baǵyttaryn qamtıdy.
Ǵalymdar Soltústik Muzdy muhıtynda sý men teńiz túbi shógindilerinen synamalar alyp, sý temperatýrasy men tuzdylyǵynyń taralýyn, sondaı-aq mıkroplastıktiń deńgeıin zertteıdi. Budan bólek, Arktıkadaǵy atmosferalyq úderister men GNSS geodezııalyq baqylaýlary júrgiziledi.
Túrkııanyń Ónerkásip jáne tehnologııa mınıstri Mehmet Fatıh Kachyrdyń aıtýynsha, ekspedıtsııanyń basty maqsaty – jahandyq klımat ózgerisiniń saldaryn zertteý jáne Túrkııanyń polıarlyq ǵylym salasyndaǵy áleýetin nyǵaıtý.
Ekspedıtsııa 24 shildede aıaqtalady dep josparlanǵan.
Eske sala keteıik, Qytaı ǵalymdary Soltústik Muzdy muhıtqa 16-ǵylymı ekspedıtsııaǵa attanǵan bolatyn.
