Túrkııa ǵalymdary altsgeımer aýrýyn erte anyqtaıtyn tehnologııa oılap tapty

ASTANA. KAZINFORM - Túrik Taıaý Shyǵys tehnıkalyq ýnıversıtetiniń (Orta Doğu Teknik Üniversitesi, ODTÜ, METU) ǵalymdary Altsgeımer aýrýynyń qaýpin erte anyqtaýǵa múmkindik beretin jasandy ıntellekt negizindegi tehnologııany oılap tapty, dep jazady Anadoly agenttigi.

METU ýnıversıtetiniń ınformatıka ınstıtýtynyń pedagogıkalyq keńesiniń jáne neıroǵylym jáne neırotehnologııa salasyndaǵy Birikken qoldanbaly zertteýler ortalyǵynyń basqarma múshesi Eshım Aıdyn Sonnyń aıtýynsha, ol silekeıden alynǵan úlgini paıdalana otyryp, genetıkalyq testileý arqyly júzege asyrylady.

Ol bul jańashyldyq dárigerlerge dıagnoz qoıý kezinde aıtarlyqtaı kómek kórsetetinin atap ótti.

- Bizge 65 jastan asqan este saqtaý qabiletiniń tómendeýi sııaqty altsgeımer aýrýynyń  belgileri bar adamdar keledi. Biz genetıkalyq saraptama júrgizgennen keıin dárigerler onyń nátıjesin klınıkalyq kórinispen biriktirip, sonyń negizinde dıagnoz qoıa alady, - dep túsindirdi ol.

Onyń aıtýynsha, zertteý tobynyń músheleri jasandy ıntellekt kómegimen halyqaralyq jumys toptary jasaǵan úsh aýqymdy derekter jıyntyǵyn taldaý negizinde aýrýdyń erte satysynda damý qaýpiniń ındıkatory bola alatyn genetıkalyq profılderdi anyqtaıdy.

– Biz ázirlegen ádis boıynsha synaqqa qatysýshylardan silekeı úlgileri alynyp, olardyń DNQ-sy anyqtalady. Zertteýler aýrýdyń qaýpin 1,5-2 ese arttyratyn genetıkalyq ózgeristerdi anyqtady. Bizdiń joba aıasynda molekýlalyq dıagnostıkalyq jınaqtyń prototıpi ázirlendi, - dep jalǵastyrdy ol.

Bul ádis Altsgeımer aýrýymen aýyratyn 100 naýqasqa qoldanyldy.

Ǵalym Altsgeımer aýrýyn erte dıagnostıkalaýdyń keıingi emdeýde mańyzy zor ekenin atap ótti.