Túrkııa Eýropa óndirisiniń strategııalyq quramdas bóligine aınalýy múmkin
ASTANA. KAZINFORM — Eýropalyq komıssııa ónerkásipti jedeldetý týraly Zań jobasyn (Industrial Accelerator Act) tanystyrdy. Bul zań Eýropanyń óndiristik bazasyn nyǵaıtýǵa baǵyttalǵan jáne Túrkııany EO óndiristik ekojúıesiniń quramdas bóligi retinde qarastyrady, dep habarlaıdy Kazinform agenttiginiń Ankaradaǵy menshikti tilshisi.
Eýropalyq komıssııanyń málimetinshe, ónerkásipti jedeldetý Zańy Eýropa Odaǵynda óndiristik bazany kúsheıtip, jahandyq básekelestik pen geosaıası shıelenis jaǵdaıynda syrtqy jetkizýshilerge táýeldilikti azaıtýdy kózdeıdi.
Inıtsıatıvanyń maqsaty — 2035 jylǵa qaraı EO ekonomıkasynda óńdeýshi ónerkásiptiń úlesin 14,3%-dan 20%-ǵa deıin arttyrý. Zań jobasy energııa kóp qajet etetin salalardy, sonyń ishinde bolat, tsement, alıýmınıı, hımııa ónerkásibin, sondaı-aq avtokólik sektoryn jáne «nóldik emıssııa» (net-zero) tehnologııalaryn qamtıdy.
Zańnyń negizgi quraldarynyń biri — memlekettik satyp alý júıesin paıdalanyp eýropalyq óndiristi qoldaý. Keıbir taýarlarǵa «EO-da jasalǵan» talaptaryn engizý josparlanǵan. Aıta ketý kerek, Eýropa elderindegi memlekettik satyp alýdyń jalpy kólemi shamamen 2 trln eýrony quraıdy, bul EO JІÓ-niń 14%-yna teń.
Strategııalyq salalarda naqty talaptar usynylǵan:
-
Kún panelderiniń negizgi komponentteri úsh jyl ishinde Eýropada óndirilgen bolýy tıis;
-
Memlekettik tender arqyly satyp alynǵan elektromobılder EO aýmaǵynda qurastyrylyp, olardyń komponentteriniń keminde 70%-y Eýropada jasalýy kerek (akkýmýlıatorlardan basqa);
-
Bolat pen alıýmınıı úshin memlekettik satyp alý maqsatynda ónimniń 25%-y eýropalyq shyǵý tegine ıe jáne tómen kómirtekti iz qaldyrýy tıis.
Sonymen qatar, zań jobasynda strategııalyq salalarǵa sheteldik ınvestıtsııalardy qatań baqylaý qarastyrylǵan — eger úshinshi el álemdik óndiris qýatynyń 40%-dan astamyn baqylaıtyn bolsa jáne ınvestıtsııa 100 mln eýrodan assa.
Qujatta Túrkııaǵa erekshe nazar aýdarylǵan. Keden odaǵynyń arqasynda el Eýropanyń óndiristik ekojúıesiniń mańyzdy bóligi retinde qarastyrylady. Zań jobasy «EO-da jasalǵan» krıterııin potentsıaldy túrde Túrkııa kásiporyndaryna da qoldanýǵa quqyqtyq negiz jasaıdy.
Eske salaıyq, buǵan deıin 2025 jyly Túrkııa Eýropada jel elektr stantsııalaryn iske qosý kólemi boıynsha ekinshi orynǵa shyqqanyn jazǵan edik.
