Túrkııa Erdoǵannyń Peterbýrgke baratynyn habarlady
ASTANA. QazAqparat - Túrkııa premer-mınıstriniń orynbasary Mehmet Shımshek Rejep Erdoǵannyń 9 tamyz kúni Peterbýrge keletinin málimdedi, dep habarlaıdy RBK.
Seısenbi kúni Reseı men Túrkııanyń premerleriniń orynbasarlary Máskeýde kezdesti. Reuters agenttiginiń jazýynsha, taraptar jeltoqsan aıynda túrik áskerı-áýe kúshteriniń reseılik Sý-24 bombalaýshysyna shabýylynan keıin syzat túsken eki el arasyndaǵy saýda jáne ekonomıkalyq qarym-qatynasty qaıta bastaý máselesin talqylady.
«Biz munda 24 qarashaǵa deıin bolǵan jaqsy qarym-qatynasymyzdy joǵarǵy deńgeıge kóterýge keldik», - dedi M.Shımshek.
Erdoǵan Pýtınge Sý-24 ushaǵymen bolǵan oqıǵaǵa ókinishin bildirip, hat jazǵannan keıin ókpe-renishtiń tońy jibı bastady. Reseı Túrkııaǵa barýǵa salynǵan tyıymdy alyp tastady, charterlik reıster qaıta ashyldy. Aýyl sharýashylyǵy mınıstri Aleksandr Tkachev Máskeýdiń Túrkııa azyq-túligine salynǵan tyıymdy alýǵa asyqpaıtynyn jetkizdi.
Dvorkovıchtiń aıtýynsha, Erdoǵannyń haty memleketter arasyndaǵy qarym-qatynastyń qalpyna kelýine negiz boldy. «Premer-Mınıstr úkimetaralyq komıssııanyń jumysyn qaıta bastaý týraly sheshimge qol qoıdy, - dedi premer-mınıstr orynbasary. - Bul bizdiń alǵa damýymyzǵa múmkindik beredi».
Osy tusta Dvokrovıch memleketter arasyndaǵy qarym-qatynas kezeń-kezeńimen qalpyna kelýi tıis ekenin atap ótti. Kezdesýde Shımshek tóńkeris jasaý áreketi kezinde Túrkııanyń resmı bıligin qoldaǵany úshin Reseı tarapyna alǵys bildirdi. Onyń aıtýynsha, Máskeý «demokratııany jáne Túrkııa bıligin qoldady».
Oǵan Dvorkovıch «Reseı qoldanystaǵy bılikti qulatýǵa tyrysatyn konstıtýtsııaǵa qarsy áreketterdiń bolýyna jol bermeý pozıtsııasyn nyq ustanady», dep jaýap berdi.
