Túrkııa Erdoǵannyń áskerı ókilettigin keńeıtýi múmkin
ASTANA.KAZINFORM — Túrkııanyń Ulttyq jınalysynda prezıdent Rejep Taıyp Erdoǵannyń áskerı saladaǵy ókilettigin keńeıtetin zań jobasy qaralyp jatyr, dep habarlaıdy Kazinform tilshisi.
Bıliktegi Ádilet jáne damý partııasynyń (AKP) depýtattary Ulttyq Májiliske usynǵan qujatynda joǵary áskerı qolbasshylardyń qyzmet merzimin 72 jasqa deıin uzartý múmkindigi qarastyrylǵan.
Zań qabyldansa, memleket basshysy Túrkııa Qurlyq, Áýe jáne Áskerı-teńiz kúshteri qolbasshylarynyń ókilettigin jeke ózi uzarta alady. Osyǵan uqsas erekshelik buryn Qarýly Kúshter Bas shtabynyń bastyǵyna da jasalǵan bolatyn.
Sözcü gazetiniń habarlaýynsha, usynylǵan jańashyldyq jasy buryn belgilengen zeınetkerlikke shyǵý shegine jaqyndap qalǵan qazirgi komandırlerge tikeleı áser etýi múmkin.
Belgili bolǵandaı, túrik armııasynyń keıbir jetekshileri 64 jastan asqan:
* Qurlyq áskerleriniń qolbasshysy Selchýk Baıraktaroǵly– 64 jasta;
* Áskerı-áýe kúshteriniń bastyǵy Zııa Djemal Kadyoǵly — 64 jasta;
* Áskerı-teńiz kúshteriniń basshysy Erdjıýment Tatlyoǵly — 65 jasta.
Zań jobasynda kórsetilgen taǵy bir mańyzdy túzetý — qyzmette joǵarylatý sharttaryn ózgertý. Atap aıtqanda, korpýs generaly nemese vıtse-admıraly ataǵyn berý úshin budan bylaı áskerı akademııanyń túlegi bolý jáne «kýrmaı» (shtab ofıtseri) mártebesin ıelený qajet emes.
Osy turǵyda sarapshylar mundaı bastamalardyń Túrik qarýly kúshterindegi kadrlyq qurylymdy aıtarlyqtaı ózgertip, atqarýshy bıliktiń joǵarǵy áskerı basshylyqqa yqpalyn arttyra alatynyn atap ótti.
Jalpy, Túrkııa armııasy prezıdenttiń áskerı saladaǵy ókilettigin keńeıtetin zańnamalyq bastamalar aıasynda nyǵaıýda. Sonymen qatar, Túrik Qarýly Kúshteri tek jeke qurammen ǵana emes, sonymen qatar qarý-jaraq jaǵynan da nyǵaıyp, NATO-daǵy ustanymdaryn kúsheıtip jatyr. Zamanaýı tehnıka satyp alý jáne odaqtas oqý-jattyǵýlarǵa belsendi qatysý túrik armııasynyń jaýyngerlik ázirligin arttyrýǵa jáne alıanspen strategııalyq yntymaqtastyqty nyǵaıtýǵa múmkindik beredi.
Eske sala keteıik, buǵan deıin Túrkııa prezıdenti Rejep Taıyp Erdoǵannyń 2026 jyly NATO memleket jáne úkimet basshylarynyń sammıti Ankara qalasynda uıymdastyrylatynyn aıtqan edi.