Túrkııa EO-nyń qaıta qarýlaný baǵdarlamalaryna qatysýǵa daıyn

ASTANA. KAZINFORM — Túrkııa Eýropalyq Odaqtyń qarjylandyrý qorlary aıasyndaǵy baǵdarlamalarǵa qatysý úshin resmı ótinish berdi. Bul qordyń qarajaty qarý-jaraqty birlesip satyp alýǵa baǵyttalýy tıis, dep jazdy AZERTADJ.

Bul týraly AZERTADJ STAR gazetine silteme jasap habarlaǵan. Gazet jańa EO Qorynyń kólemi 150 mıllıard eýroǵa baǵalanatynyn eske salady.

Atap aıtqanda, zymyrandardy, áýe shabýylyna qarsy qorǵanys júıelerin (PRO), ushqyshsyz ushý apparattaryn (drondar), oq-dárilerdi, qurlyqtaǵy áskerge arnalǵan jabdyqtardy, sondaı-aq mańyzdy ınfraqurylym elementterin qorǵaý quraldaryn satyp alý máselesi qarastyrylmaq.

Basylym atap ótkendeı, Túrkııamen qatar Ońtústik Koreıa da EO-nyń bul qarjylyq baǵdarlamalaryna qatysýǵa nıetti.

Eki eldiń ótinishteri qazir Eýrokomıssııanyń qaraýynda, ol EO Keńesine usynystar daıyndaıdy.

Basylym atap ótedi: Túrkııanyń Grekııa jáne grek Kıprimen qarym-qatynasyndaǵy shıelenisti jaǵdaıǵa baılanysty, sheshimniń Seýldiń paıdasyna qabyldanýy anaǵurlym yqtımal bolyp kórinedi.

Eske sala keteıik, buǵan deıin Túrkııanyń Ortalyq banki paıyzdyq mólsherlemeni 40,5 paıyzǵa deıin tómendetkenin jazǵan edik.