Túrkııa Elshisi kómek kórsetkisi kelgen qazaqstandyqtardy resmı aqparatqa ǵana senýge shaqyrdy
«Bul jerde taǵy bir mańyzdy máseleni atap ótý kerek. Qazaqstanda arnaıy shot ashyldy. Ol shotqa bizdiń elshilik jaýap beredi. Qazir Qazaqstan tarapy da arnaıy shot ashatyny týraly áńgimeler aıtylyp jatyr. Sondyqtan úlken ótinishimiz bar. Aqparatty tek resmı kózderden ǵana alsańyzdar eken. Óıtkeni túrli adamdar bar, alaıaqtyq áreketter bolýy múmkin. Sondyqtan tek resmı aqparatqa súıenip qana sheshim qabyldaýdy suraımyz», - dedi Elshi Astanadaǵy elshilikte ótken brıfıngide.
Sondaı-aq, Qazaqstandaǵy Túrkııa elshiligi arqyly úsh jerde kómek qabyldanyp jatqanyn aıtty.
«Biz gýmanıtarlyq kómek qabyldaýdy jalǵastyramyz. Astanaǵa jetkizilgen kómek elshilikke jınalyp jatyr. Sondaı-aq, el aýmaǵyndaǵy ózge de ókildikterimizde kómek jınaý oryndary ashylǵan. Bul – Almaty jáne Aqtaý qalalaryndaǵy bas konsýldyq tar. Qarapaıym adamdardan bólek Qazaqstan Úkimeti de kómek berip jatyr. Eki ushaqpen izdestirý-qutqarý jumystaryna qutqarýshylar jiberildi. Sondaı-aq, Qazaqstan Respýblıkasy 1 mln dollar kóleminde shuǵyl kómek berý týraly sheshim qabyldaǵanyn bilemiz», - dedi Ýfýk Ekıdjı
Búgin Prezıdent Qasym-Jomart Toqaev Túrkııa Respýblıkasynyń Qazaqstandaǵy elshiligine kelip, baýyrlas eldiń ońtústik-shyǵysynda bolǵan alapat zilzala saldarynan myńdaǵan adamnyń qaza tabýyna baılanysty kóńil aıtty.
Anadolý agenttiginiń málimetinshe, Túrkııadaǵy eki joıqyn jer silkinisinen qaza tapqandar sany 6234-ke jetip, 37 011 adam jaraqat alǵan.
Sońǵy málimetter boıynsha, Túrkııada úsh qazaqstandyq izdestirilip jatyr.
