Túrkııa elshisi Astana protsesiniń basty jetistikterin atady
Brıfıng barysynda túrkııalyq dıplomat sırııalyq retteý boıynsha júrgizilgen Astana protsesiniń nátıjelerine joǵary baǵa berdi.
Atap aıtqanda, Astana protsesinde shıelenistiń barlyq taraptary alǵash ret kelissózder ústeline jınaldy. Segiz kezdesýden keıin shıelenisti deeskalatsııalaıtyn 4 aımaq qurý boıynsha naqty nátıjelerge qol jetkizildi.
N.Ýıanyktyń aıtýynsha, qazirgi ýaqytta Astana protsesiniń kepil memleketteriniń syrtqy ister mınıstrleri kezdesýin uıymdastyrý múmkindigi qarastyrylyp jatyr. Kezdesý naýryz aıynyń ortasynda Astanada ótýi múmkin.
Sondaı-aq, N. Ýıanyk qazaqstandyq jýrnalısterge Túrkııanyń Sırııadaǵy «Záıtún butaǵy» áskerı operatsııasy jóninde baıandap berdi.
Onyń aıtýynsha, 2018 jyldyń 20 qańtarynda bastalǵan «Záıtún butaǵy» operatsııasynyń basty maqsaty - túrik shekarasyn jáne aımaqty qaýipsizdikpen qamtamasyz etý jáne lańkesterdi beıtaraptandyrý. Bul operatsııa halyqaralyq quqyq normalary aıasynda BUU jarǵysynyń 51-babyna sáıkes júrgizilýde.
Elshi keltirgen derekterge sáıkes, Túrkııa segiz jyl buryn bastalǵan Sırııa daǵdarysynda 3,5 mıllıonnan astam sırııalyqty panalatyp otyr. «Záıtún butaǵy» operatsııasynyń júzege asyrylý kezinde tek qana lańkester men olar panalap júrgen mekender, lańkesterdiń qarý-jaraqtary men tehnıkalary ǵana nysanaǵa alynýda. Beıbit turǵyndar men operatsııa alańynda ornalasqan dinı oryndar men mádenı nysandar, tarıhı jáne arheologııalyq eskertkishterge zaqym kelmeýi úshin barlyq saqtyq sharalary nazarǵa alynýda.
