Túrkııa elimizdiń aýyl sharýashylyǵyna 400 mln dollar ınvestıtsııa quıǵan
ASTANA. KAZINFORM — Túrkııalyq kompanııalar Qazaqstannyń birneshe qalasynda óndiris oryndaryn salyp jatyr. Bul jóninde QR Aýyl sharýashylyǵy vıtse-mınıstri Ermek Kenjehanuly málimdedi.
— Sońǵy jyldary Túrkııa kapıtalynyń qatysýymen, quny 400 mln dollarlyq onnan astam ınvestıtsııalyq jobany iske asyrdyq. Olar — negizinen, aýyl sharýashylyǵy ónimderin óndirý, óńdeý jáne kondıterlik ónimderdi shyǵarý baǵytyndaǵy jobalar. Qazir biz quny 1 mlrd dollardan asatyn bes iri ınvestıtsııalyq jobany júzege asyryp jatyrmyz, — dedi ol.
Máselen, Astana, Almaty jáne Shymkent qalalarynda birlesken iri jobalar bastalǵan.
— Shymkentte túrkııalyq Alarko kompanııasynyń 500 gektar jylyjaı kesheni salynyp jatyr. Bul da bizdiń elimiz úshin aýyl sharýashylyǵy áleýetin damytý maqsatyndaǵy úlken jumys. Sonymen birge, Astanada Tiryaki kompanııasynyń astyqty tereń óńdeý jobasy iske asyrylyp jatyr. Odan bólek, taǵy bir túrkııalyq kompanııa Almatyda mal terisin tereń óńdeý baǵytynda jumys istep jatyr. Bul joba aıasynda jylyna 7 myń tonnadan astam jelatın óndiremiz, — dedi vıtse-mınıstr.
Aıta keteıik, buǵan deıin Qazaqstan men Túrkııa arasynda aýyl sharýashylyǵy salasyndaǵy taýar aınalymy artyp kele jatqanyn jazǵanbyz.
