Túrkııa eliniń telearnasynan qazaq tilindegi habarlar kórermenderge jol tartty
ASTANA. 27 maýsym. QazAqparat - Túrkııanyń TRT Avaz (Áýez) telearnasy qazaq tilinde habar tarata bastady. Maýsymnyń 25-i kúni alǵashqy jańalyq toptamasy efırden berildi.
Ashylǵanyna úsh jyldaı bolǵan TRT Avaz telearnasy sońǵy kezderi kórermenderge túrik tilinen basqa birneshe tilderde baǵdarlamalaryn usyna bastaǵan edi. Endi arnaıy qazaq redaktsııasy qurylyp, kún saıyn kórsetiletin jańalyqtar toptamasyn ázirleýge kiristi.
Alǵashqy baǵdarlamaǵa stýdııa qonaǵy retinde qatysqan Qazaqstannyń Túrkııadaǵy elshisi Janseıit Túımebaev bul búkil túrki dúnıesindegi eleýli oqıǵa ekenin aıryqsha atap aıtty. «TRT Avaz arnasynyń habarlary túrki halyqtaryna túrki dúnıesin tanytady, olardyń bir-birimen aralasýyna yqpal etedi, dúnıe júzine túrki álemin keńinen tanystyrady», dedi tikeleı efırdegi sózinde elshi.
Jańalyqtar toptamasyn kún saıyn Astana ýaqytymen 19.30-da, Ankara ýaqytymen 16.30-da onlaın rejiminde kórýge bolady /www.trt.net.tr/trtavaz/.
