Túrkııa elektr jelilerin jańǵyrtýǵa 28 mlrd dollar ınvestıtsııa salmaq
ASTANA. KAZINFORM — Túrkııa elektr energııasyna degen suranystyń artýyna jáne tabıǵı kózderden elektr qýatyn óndirý kóleminiń ulǵaıýyna baılanysty elektr jelisi ınfraqurylymyn aıtarlyqtaı keńeıtip, jańǵyrtýdy josparlap otyr, dep habarlaıdy Kazinform agenttiginiń Ankaradaǵy menshikti tilshisi.
Energetıka jáne tabıǵı resýrstar mınıstri Álparslan Baıraktardyń aıtýynsha, Túrkııa 2035 jylǵa qaraı elektr energııasy jelilerin damytýǵa 28 mıllıard dollar ınvestıtsııa salýdy josparlap otyr.
Onyń aıtýynsha, elektr jelileriniń uzyndyǵy 2005 jáne 2025 jyldar aralyǵynda 80%-ǵa, dálirek aıtqanda, 43 000 shaqyrymnan 77 000 shaqyrymǵa deıin ósti. Osy kezeńde Túrkııa elektr berý kompanııasyna tıesili qosalqy stansalar sany 512-den 824-ke deıin, al transformatorlar sany 1096-dan 2215-ke deıin ósken. Transformatorlardyń jalpy qýaty 226%-ǵa artyp, 236 913 megaVolt-Amperge (MVA) jetti.
Baıraktar elektr energııasyn tutynýdyń artýy, ýrbanızatsııa, óndiristik qýattardyń damýy, elektr kólikteriniń kóbeıýi, derekter ortalyqtarynyń salynýy jáne kondıtsıonerlerdiń qoldanylýynyń artýy qosymsha ınvestıtsııalardy talap etetinin tilge tıek etti.
Túrik bıligi Kún jáne jel energııasyn elektr jelisine biriktirýge erekshe nazar aýdarýda. Jańartylatyn energııa kózderin damytý jol kartasynyń bóligi retinde Túrkııa 2035 jylǵa qaraı kún jáne jel elektr stansalarynyń jalpy qýatyn 120 GVt-qa deıin arttyrýdy maqsat etedi. Osy maqsatqa jetý úshin elektr energııasyn óndirý salasyna 80 mıllıard dollar jáne elektr energııasyn berý jelileri ınfraqurylymyna 28 mıllıard dollar bólinedi.
Sonymen qatar, jalpy ótkizý qýaty 28 GVt bolatyn shamamen 9 580 km joǵary voltty turaqty tok jelileri tartylyp, 15 000 km jańa aınymaly tok jelileri paıdalanýǵa beriledi.
Mınıstr sonymen qatar Túrkııanyń bıyl qarashada Antalııada ótetin COP31 klımat konferentsııasynda elektrlendirý máselelerine basymdyq beretinin jetkizdi. Baıraktardyń aıtýynsha, Túrkııa 2035 jylǵa qaraı energııa tutynýdaǵy elektr energııasynyń úlesin 35%-ǵa deıin arttyrý maqsatyn qoıyp otyr.
Buǵan deıin Túrkııada sońǵy on jylda kún jáne jel energııasynyń úlesi aıtarlyqtaı óskenin habarlaǵan edik.
Nurlan Tuıaqov
