Túrkııa dárigerleri tájirıbe bólisý úshin Túrkistanǵa keldi

TÚRKІSTAN. QazAqparat - Túrkistanda Halyqaralyq sımpozıým bastaldy, dep habarlaıdy QazAqparat.

27-28 sáýir kúnderi Túrkııanyń úzdik hırýrg dárigerleri óz tájirıbelerimen bólisedi.

Shara barysynda balalardyń týa bitken aýrýlary men sút bezi qaterli isigin ota ádisimen emdeý máseleleri talqylanbaq.
Aıta ketsek, sımpozıýmǵa Túrkııanyń «Lıv Ýlýs» klınıkasynyń bilikti dárigerleri arnaıy keldi. Búginde Túrkııanyń 17 qalasynda atalmysh mekemeniń 37 aýrýhanasy bar.

Jıynda alǵashqy bolyp hırýrgııa salasynda 33 jyldyq tájirıbesi bar Selamı Sezıýbır sóz sóıledi.

Onyń aıtýynsha, pandemııa jaǵdaıynda B2B formatynda kezdesý uıymdastyrý dárigerler úshin zor múmkindik.

«Búgingi kezdesý biz úshin óte mańyzdy. 33 jyl hırýrgııa salasynda qyzmet etip kelemin. Meniń Qazaqstannan keletin naýqastarym kóp bolǵan. Bir baıqaǵanym qazaqstandyq dárigerlerdiń tájirıbesi mol. Sondyqtan búgingi jıyn barlyǵymyz úshin paıdasy zor. Ózara tájirıbemen bólisip, biliktiligimizdi arttyratyn bolamyz»,- deıdi professor Selamı Sezıýbır.
Sharaǵa Túrkistan oblysynyń dárigerleri de qatysýda. Aımaqta búginde jalpy 23 429 medıtsına qyzmetkeri bar. Onyń 5 myńnan astamy dárigerler, qalǵandary orta býyn mamandary.
Elimizde jyl saıyn ana men bala densaýlyǵyn saqtaýǵa erekshe kóńil bólinip keledi. Prezıdent Joldaýlarynda, densaýlyq saqtaý salasyn damytýǵa arnalǵan baǵdarlamalarda bul másele nazardan tys qalǵan emes.