Túrkııa búldirshinderi balabaqshada qazaqtyń ulttyq oıynyn oınaıdy
ASTANA. KAZINFORM — Qazaqstan men Túrkııa balabaqshalarynyń oqý baǵdarlamasyna qazaqtyń ulttyq oıyny engizildi.
QR Oqý-aǵartý mınıstrligi ulttyq ǵylymı-praktıkalyq dene tárbıesi ortalyǵynyń málimetinshe, búgingi tańda elimizdiń jáne Túrkııanyń birqatar balabaqshasynyń oqý baǵdarlamasyna qazaqtyń ulttyq «Bestemshe» oıyny engizilgen.
«Bestemshe» — álemdik mádenıettiń ozyq úlgilerimen boı teńestire alatyn, toǵyzqumalaq oıynynyń yqshamdalǵan túri.
Kishkentaı balalardyń qaýipsizdigi men múmkindikterin eskere otyryp jobalanǵan.
«Qundylyqtarǵa negizdelgen bilim berý jobasy aıasynda „Bestemshe“ oıynynyń balabaqsha jasyndaǵy balalar arasynda oınatylýy — balany tek oıynǵa baýlý emes, ulttyq mádenıetimizben tanystyrýdyń alǵashqy qadamdary. Atalǵan ulttyq zııatkerlik oıyn arqyly balalardyń logıkalyq oılaý qabileti, saraptama jasaý, sheshim qabyldaý daǵdylary qalyptasady, alǵyrlyǵy, zerektigi de arta túsedi», — deıdi bestemshe oıynynyń avtory, ortalyqtyń trener-lektory, qazaqtyń ulttyq bestemshe oıynyn damytýshy, f.ǵ.k. Maqsat Shotaev.
Bestemshe oıyny qazir 2023-2025 jyldarǵa arnalǵan «Mektepke deıingi bilim berý pedagogteriniń, tárbıeshileri men dene shynyqtyrý nusqaýshylarynyń kásibı quzyrettiligi men daǵdylaryn damytý» atty biliktilikti arttyrý kýrsynda pedagogterge oqytylyp jatyr.
Onda oıynnyń maqsaty, erejesi jáne sharttary túsindirilip, ulttyq sporttyń ereksheligi dáriptelýde.
