Túrkııa brondy kólikterin elektrli qozǵaltqyshqa kóshire bastady
ASTANA. KAZINFORM — Túrkııada brondy avtokóliktiń jańa elektrlik nusqasy ázirlendi. Onyń qozǵalý qabileti joǵary jáne qazirgi zamanǵy áskerı mindetterge beıim, sondaı-aq birden kózge túspeıtindigimen erekshelenedi, dep habarlaıdy Kazinform agenttiginiń Ankarada menshikti tilshisi.
úrkııanyń qorǵanys ónerkásibi brondy tehnıka salasyndaǵy ónimderin jańartý jumysyn jalǵastyrýda. Olar qazir jańa tehnologııalyq sheshimderge basymdyq berip otyr. Bıyl Ystanbulda ótetin halyqaralyq «SAHA 2026» kórmesinde jańartylǵan brondy avtokólikterdiń konfıgýratsııalary, sonyń ishinde tolyq elektrlik model tanystyrylatyn bolady.
Jańa joba keń aýqymdy mindetterdi oryndaýǵa arnalǵan elektrli jeńil brondy kóliktiń nusqasy. Ol kólik tasymaldaý, oq atý jáne barlaý sııaqty mindetterdi oryndaýǵa qabiletti. Kóliktiń basty erekshelikteri — dybystyń tómendigi jáne ekologııalyq tazalyq, bul ony barlaý jáne baqylaý operatsııalarynda asa tıimdi etedi.
Joba avtorlarynyń aıtýynsha, qazirgi ýaqytta joba sońǵy synaqtardan ótip jatyr. Qurastyrý men negizgi synaqtar aıaqtalǵan, endi tek uzaq qashyqtyqtarǵa tekserý jáne qosymsha jabdyqtardy ıntegratsııalaý jumystary qaldy. Barlyq synaqtar bıylǵy jyldyń sońyna deıin aıaqtalýy tıis.
Іshki janý qozǵaltqyshynan bas tartý kóliktiń shý men jylý sáýlesin azaıtýǵa, sondaı-aq elektrlik qýat júıesiniń jyldam ári jeńil manevr jasaýyn qamtamasyz etýge múmkindik berdi. Kólik paıdalaný jaǵdaılaryna baılanysty 200 kılometrge deıin jete alady.
Bolashaqta bul kólikti kolonnalardy qorǵaý úshin aldyńǵy qatarly dron nemese qashyqtan basqarylatyn qural retinde paıdalaný josparlanyp otyr. Onyń kózge túspeıtindigi jáne ekıpajdyń bolmaýy kóliktiń barlaý jáne qaýipterdi erte anyqtaý fýnktsııalaryn oryndaýyna múmkindik beredi.
Sonymen qatar, platformanyń ótý qabileti joǵary jáne zamanaýı qorǵaý júıelerimen jabdyqtalǵan, onyń ishinde hımııalyq, bıologııalyq jáne radıatsııalyq qaterlerge qarsy, sondaı-aq avtomatty órt sóndirý júıeleri bar.
Osyǵan deıin Túrkııada drondardy qoldaný sany men tehnıkalardyń aıtarlyqtaı óskeni týraly habarlanǵan bolatyn. 2025 jylǵy Azamattyq avıatsııa basqarmasynyń esebine sáıkes, Túrkııada tirkelgen dron ushqyshtarynyń sany 1,6 mıllıonnan astam adamdy quraǵan.
Osyǵan deıin Túrkııada dron paıdalanýshylarynyń sany artqany týraly jazdyq.
