Túrkııa Bosfor jáne Dardanell buǵazdary arqyly ótetin kemeler aqysyn taǵy da kóterdi
ASTANA.KAZINFORM — Búginnen bastap Túrkııa strategııalyq mańyzy bar Bosfor jáne Dardanell buǵazdary arqyly kemelerdiń tranzıttik ótý tólemin taǵy da arttyrdy, dep habarlaıdy Kazinform tilshisi.
Qazir kemelerdiń ótý quny 15%-ǵa ósti jáne taza sý yǵystyrý tonnasyna 5,83 dollar boldy.
Bul Túrkııa prezıdenti Rejep Taıyp Erdoǵannyń jarlyǵymen tarıfterdi qaıta qaraý protsesi bastalǵan 2022 jyldan bergi tórtinshi ósim. Úsh jyl ishinde ótý quny 7,2 esege ósti.
Tólemder Montre konventsııasynyń erejelerine sáıkes esepteledi jáne tranzıttik kemelerge qoldanylady. El bıligi tólemniń ósýi teńiz tasymalynyń artýy, táýekelderdiń artýy, sondaı-aq jaǵalaý ınfraqurylymy men qaýipsizdik qyzmetterine túsetin aýyrtpalyqpen baılanysty ekenin atap ótti.
Túrkııanyń kólik jáne ınfraqurylym mınıstri Abdıýlkadır Ýraloǵlynyń aıtýynsha, alymdardan túsken qarajat jaǵalaý kúzeti, qutqarý jáne medıtsınalyq qyzmetter jumysyn qarjylandyrýǵa, sondaı-aq sýdaǵy apattardyń saldaryn joıýǵa jumsalady.
2024 jyldyń sońyna qaraı 51 myńnan astam keme buǵazdardan ótip, jalpy somasy 227 mıllıon dollar alym tólendi. Jańa tarıf memleket bıýdjetine budan da kóp kiris ákelýi tıis.
Bul arada sarapshylar Túrkııanyń tarıf saıasatyn qaıta qaraý arqyly tek shyǵynnyń ornyn toltyryp qana qoımaı, mańyzdy ekonomıkalyq jáne strategııalyq resýrs retinde buǵazdardyń rólin kúsheıtýdi kózdep otyrǵanyn atap ótti.
Buǵan deıin bıylǵy jyldyń 1 shildesinen bastap Túrkııanyń strategııalyq mańyzy bar Bosfor jáne Dardanell buǵazdary arqyly kemelerdiń ótý tarıfi taǵy da kóteretinin jazǵan bolatynbyz.
Aıta ketelik Túrkııada 50 myńnan astam adam evakýatsııalanǵan edi.