Túrkııa Bosfor men Dardanell buǵazy arqyly ótetin kemelerdiń tranzıttik alymyn kóterdi
ASTANA.KAZINFORM — 1 shildeden bastap Túrkııa Bosfor men Dardanell buǵazdary arqyly túrik porttaryna kirmeı ótetin halyqaralyq kemeler úshin tranzıt alymyn kóterdi, dep habarlaıdy Kazinform agenttiginiń Ankaradaǵy tilshisi.
Túrkııanyń kólik jáne ınfraqurylym mınıstri Abdýlkadır Ýraloglý buǵan deıin 1936 jylǵy Montre konventsııasynyń erejelerine sáıkes «altyn frank» dep atalatyn negizde eseptelgen alymdar ulttyq ekonomıkanyń múddesin kórsetý úshin jyl saıyn qaıta qaralatynyn málimdegen bolatyn.
Ol 1983 jyldan 2022 jyldyń 7 qazanyna deıin alym taza tonnaj (NRT) birligine 0,80 dollar bolǵanyn eske saldy. 2022 jyly tarıfterdi qaıta qaraýdan keıin tarıf 4,08 dollarǵa deıin, sodan keıin 2023 jyly 4,42 dollarǵa, 2024 jyly 5,07 dollarǵa jáne 2025 jyly 5,83 dollarǵa deıin kóterildi.
2026 jyldyń 1 shildesinen bastap tarıf taza tonnaj birligine 6,70 dollar (shamamen 3200 teńge) boldy.
Ýraloglý Montre konventsııasynda kózdelgen úsh baǵyt boıynsha alym alynatynyn atap ótti: sanıtarlyq baqylaý, maıaktardy paıdalaný jáne kemelerge arnalǵan apattyq-qutqarý qyzmetteri.
Túrkııa agenttiginiń málimeti boıynsha, tarıftiń ósýi memlekettik kiristi aıtarlyqtaı arttyrdy. 2021 jyldyń 1 shildesi men 2022 jyldyń 30 maýsymy aralyǵynda kemeler arqyly túsken kiris shamamen 38 mıllıon dollar bolsa, 2024 jyldyń 1 shildesi men 2025 jyldyń 30 maýsymy aralyǵynda 223 mıllıon dollarǵa jetti.
2025 jyldyń 1 shildesi men 2026 jyldyń 30 maýsymy aralyǵynda Túrkııa bıligi Túrkııa buǵazdary arqyly ótken kemelerden shamamen 254 mıllıon dollar kiris alady dep boljandy. Sońǵy tarıfterdiń ósýi shetel valıýtasynyń aǵynyn arttyryp, memlekettik bıýdjettiń kirisin nyǵaıtady.
Biz buǵan deıin Túrkııa Bosfor jáne Dardanell buǵazdary arqyly ótetin kemeler aqysyn taǵy da kótergenin habarlaǵan bolatynbyz.
