Túrkııa Booking jáne ózge de sheteldik brondaý platformalaryna qoıylatyn talaptardy ózgertpek
ASTANA. KAZINFORM — Túrkııa bıligi turǵyn úıdi brondaýǵa arnalǵan sheteldik onlaın-platformalarǵa qatysty jańa talaptar ázirlep jatyr. Bul týraly Kazinform agenttiginiń Ankaradaǵy menshikti tilshisi habarlady.
Túrkııada turǵyn úıdi brondaý jáne týrıstik qyzmetter usynatyn sheteldik tsıfrlyq platformalardyń qyzmetin retteıtin zań jobasy daıyndalýda. Qujat kúshine engennen keıin belgilengen talaptardy oryndaǵan kompanııalar Túrkııa naryǵynda qaıtadan jumys isteýge múmkindik alady. Olardyń qatarynda shamamen toǵyz jyl buryn eldegi qyzmetin toqtatqan Booking.com platformasy da bolýy yqtımal.
Zań jobasyna sáıkes, sheteldik platformalar Túrkııada resmı ókildigin ashyp, qyzmet kórsetýge ruqsat alýǵa mindetteledi. Bul ruqsatty ár eki jyl saıyn jańartyp otyrý qajet bolady. Ony uzartý quny 5 mıllıon túrik lırasyn (105 myń AQSh dollarynan astam) quraıdy.
Sonymen qatar kompanııalar tsıfrlyq qyzmetterge salynatyn salyqty tólep, jyldyq aınalymynyń 0,05 paıyzyn Túrkııanyń Týrızmdi ilgeriletý jáne damytý agenttigine (TGA) aýdaryp otyrýy tıis.
Qujatta naryqtaǵy básekelestikti baqylaýdy kúsheıtý de qarastyrylǵan. Platformalar paıdalanatyn algorıtmderdiń ashyqtyǵyn qamtamasyz etip, naryqta ústem jaǵdaıǵa ákelýi múmkin tájirıbelerden bas tartýǵa mindetteledi. Sonymen qatar qonaqúıler óz qyzmetterin basqa da satý arnalary arqyly qatar usyna alady.
Zań jobasy sheteldik platformalardyń komıssııa mólsherine de shekteý engizedi. Olar Túrkııa aýmaǵyndaǵy satylymdardan 17 paıyzdan artyq komıssııa ala almaıdy.
Sondaı-aq mundaı platformalarǵa týrpaketterdi satýǵa tyıym salynady. Olar tek qonaqúıdi brondaý, áýe bıletterin rásimdeý jáne transfer qyzmetterin ǵana usyna alady.
Zań jobasy jaqyn arada Túrkııa parlamentiniń qaraýyna engiziledi dep kútilip otyr.
Buǵan deıin Túrkııada qonaqúılerge kelýshilerdi tirkeý tártibine qoıylatyn jańa talaptardyń resmı túrde kúshine engeni habarlanǵan bolatyn.
Aıta keteıik, Túrkııada týrızm salasynyń tabysy tómendedi.
