Túrkııa bıligi Reseıdiń bombalaýshy ushaǵyn atyp túsirgen qos ushqyshty qamaýǵa aldy
ASTANA. QazAqparat - Túrkııa bıligi ótken jyldyń qarasha aıynda Reseıdiń bombalaýshy Sý-24 ushaǵyn atyp túsirgen qos ushqyshty qamaýǵa aldy. Bul týraly Blýmberg túrkııalyq joǵary shendi sheneýnikke siltememen habarlady.
«Sırııa shekarasy mańynda Reseıdiń bombalaýshy Sý-24 ushaǵyn atyp túsirgen eki ushqysh qamaýǵa alyndy», degen habardy túrkııalyq sheneýnik onyń atyn atamaý týraly shartpen aıtyp bergen.
Bul týraly RIA Novostı jazady.
Reseı men Túrkııa arasynda salqyndyq ótken jyldyń 24 qarashasynda Túrkııanyń joıǵysh ushaǵy Sırııa shekarasy mańynda Reseıdiń bombalaýshy Sý-24 ushaǵyn atyp túsirgennen keıin bastalǵan. RF Prezıdenti Vladımır Pýtın muny «arqaǵa jasaǵan soqqy» dep ataǵan edi. Osydan soń Reseı Túrkııaǵa birqatar ekonomıkalyq shekteýler qoıǵan. Al maýsym aıynyń sońynda Pýtın Túrkııamen eki el arasynda saýda-ekonomıkalyq qatynas qaıta qalpyna kele bastaǵanyn málimdegen bolatyn.
