Túrkııa bıligi: Ankaradaǵy lańkestik qurbandarynyń sany 95 adamǵa jetti
ASTANA. QazAqparat - Ankarada oryn alǵan eki qýatty jarylys saldarynan kóz jumǵandar sany 95 adamǵa jetti, dep jazady TASS. Bul týraly Túrkııa premer-mınıstri ákimshiliginiń úılestirý ortalyǵynan habarlaǵan.
«Shabýyldan zardap shekken 246 adam aýrýhanalarda emdelip jatyr, olardyń 48-iniń hali aýyr. 95 el azamaty kóz jumdy», - delingen málimdemede. El bıligi bes medıtsınalyq tikushaq pen bir arnaıy ushaqty ázirlikte ustap otyr. Túrkııadaǵy terrorıstik toptardyń eshqaısysy ázirge bul lańkestikti óz moınyna almaı otyr.
Eske sala keteıik, senbi kúni Ankarada «Eńbek. Beıbitshilik. Demokratııa» beıbit narazylyq sherýi kezinde 2 jarylys oryn alǵan bolatyn. Sherýge qatysýshylar túrik bıligi men kúrdter arasyndaǵy áskerı qaqtyǵystardy toqtatýdy suraǵan edi. Ankaradaǵy teraktiden soń elde úsh kúndik qaraly kún jarııalandy.
QR SІM resmı ókili Altaı Abıbýllaevtyń habarlaýynsha, Ankaradaǵy terakt saldarynan qaza tapqandar men zardap shekkender arasynda qazaqstandyqtar joq. Foto: Burhan Ozbilici / AP
