Túrkııa bıyl taýar eksportyn 390 mıllıard dollarǵa deıin jetkizýdi josparlap otyr

ASTANA. KAZINFORM — Túrkııa 2025 jyldyń sońyna deıin taýarlar men qyzmetterdiń eksport kólemin 390 mıllıard dollarǵa jetkizýdi kózdep otyr. Bul maqsatty Túrkııanyń Saýda mınıstrligi jarııalady, dep habarlaıdy AZƏRTAC.

Mınıstrliktiń málimdeýinshe, 2002 jyly Túrkııanyń álemdik taýar eksportyndaǵy úlesi 0,55 % bolsa, qazir bul kórsetkish 1,07 %-ǵa jetken. Al qyzmetter eksporty boıynsha eldiń úlesi 0,84 %-dan 1,32 %-ǵa deıin artqan.

– 2002 jyldan 2024 jylǵa deıin Túrkııa eksportynyń jalpy kólemi jeti esege artty, – dep málimdedi Saýda mınıstrligi.

Ótken jyly Túrkııa taýarlar men qyzmetter eksporty boıynsha tarıhı rekordqa qol jetkizip, 377 mıllıard dollarǵa jetken.

2025 jyldyń qańtar–shilde aralyǵynda el 156,4 mıllıard dollar kóleminde eksport júzege asyrǵan.

Jyldyń alǵashqy aılarynda Túrkııa úshin negizgi eksport naryqtary:

• Germanııa

• Ulybrıtanııa

• AQSh

• Italııa

• Irak boldy.

Tek qyzmet kórsetý eksporty boıynsha 2025 jylǵa maqsat – 121 mıllıard dollar. Al qańtar–mamyr aılarynda bul kórsetkish 40,1 mıllıard dollardy qurady.

Ankara bul nátıjelerdi Prezıdent Rejep Taıyp Erdoǵannyń úkimetiniń ekonomıkalyq saıasatynyń jetistigi dep baǵalap otyr.

– Sońǵy 22 jylda Túrkııa ekonomıkasynyń ortasha ósimi – 5,3 %. Sońǵy on jylda Túrkııa EYDU (OECD) elderi arasynda damý qarqyny boıynsha kósh bastap keledi, – delingen málimdemede.

Mınıstrlik jahandyq daǵdarystar men syn-qaterlerge qaramastan, Túrkııanyń úzilissiz ekonomıkalyq ósimi 19 toqsan qatarynan jalǵasyp jatqanyn atap ótti.

2024 jyly Túrkııanyń JІÓ kólemi – 1 trln 322 mlrd dollar, al aǵymdaǵy jyldyń birinshi toqsanynda bul kórsetkish 1 trln 371 mlrd dollarǵa jetken.

Sondaı-aq, jan basyna shaqqandaǵy JІÓ 2002 jyly 3 608 dollar bolsa, 2025 jyldyń birinshi toqsanynda 15 971 dollarǵa deıin ósken.

Eske sala keteıik, buǵan deıin Túrkııa armııasynda jańa kezeń bastalyp, Erdogan generaldar men admıraldardy taǵaıyndaǵanyn jazǵan edik.